„როდესაც ასეთ უმძიმეს დანაშაულს ჰქონდა ადგილი და ხელისუფლებამ ეს იცოდა, ამ ბრალის წაყენება თავის დროზე უნდა მომხდარიყო და ეს პროცესი „ფაჩიკოს გარმონივით" არ უნდა ყოფილიყო გაწელილი, ასეთ დანაშაულზე დანდობა არ შეიძლება," - ასე აფასებს „რეზონანსთან" ექსპერტი უსაფრთხოების საკითხებში ვახტანგ მაისაია თბილისის ყოფილი მერის, გიგი უგულავას დაპატიმრებას.

„უგულავას დაპატიმრებას პოლიტიკურ ჭრილში ვერ გადავიტან, რადგან რაც მან ჩაიდინა, ეს უმძიმესი დანაშაულია, ე.წ. თეთრსაყელოიანი დანაშაული, ამერიკაში ეს ყველაზე უმძიმესი კორუფციული დანაშაულია, როდესაც საბიუჯეტო თანხებს კონკრეტული პოლიტიკური პროცესების სამართავად იყენებ და ცდილობ, რომ პოლიტიკური გადატრიალება მოახდინო. 48 მილიონი ლარის ჯიბეში ჩადება, ეს უმძიმესი დანაშაულია. ასეთი ტიპის დანაშაულზე ამერიკაში უვადო სასჯელია, ამის გამო პრეზიდენტებსაც კი აყენებენ,“ - განაცხადა ვახტანგ მაისაიამ.