ჯანდაცვის მინისტრის მოადგილემ თამარ გაბუნიამ კორონავირუსის ევროპის ქვეყნებში გავრცელებასთან დაკავშირებით და საქართველოში მიმდინარე პროცესებზე „დღის ქრონიკის“ პირდაპირ ეთერში ისაუბრა.

მინისტრის მოადგილემ ჩინეთის მაგალითი მოიყვანა და აღნიშნა, რომ ჩინეთის ძალიან წარმატებული გამოცდილება, რომელიც კოორდინირებული მუშაობის შედეგია, ჩვენც შეგვიძლია გავიზიაროთ.

„ჩინეთში რამდენიმემილიონიანი ქალაქი ძალიან მალე მოექცა კარანტინში და დღემდე გრძელდება ეს ღონისძიება. ჩინეთმა თავიდან გამოიყენა სიმპტომური მკურნალობა დაავადების მიმართ, თუმცა, შემდეგ, ეტაპობრივად, მკურნალობაში  ჩართო სხვა ცნობილი ანიტივირუსულ მედიკამენტები, რამაც კარგი შედეგი გამოიღო და დღეს ჩვენ შეგვიძლია გავიზიაროთ ჩინეთის ძალიან წარმატებული გამოცდილება.

ჩინეთი ძალიან დეტალურად მიჰყვებოდა ჯანმთელობის მსოფლიო ორგანიზაციის რეკომენდაციებს. ეს იყო დისციპლინირებულობის მაღალი ხარისხი მოქალაქეების მხრიდან. გადარჩენის მთავარი გზა არის იმ წესის დაცვა, რომელსაც გვკარნახობს ჯანმრთელობის მსოფლიო ორგანიზაცია, ჯანდაცვის სამინისტრო, სამედიცინო პერსონალი, რათა გვქონდეს მაქსიმალური შესაძლებლობა ვირუსის გადაცემის პრევენციის“, - აღნიშნა მინისტრის მოადგილემ.

თამარ გაბუნიამ ქრონიკული დაავადების მქონე ადამიანებს განსაკუთრებული სიფრთხილისკენ მოუწოდა.

„კარგი ამბავი არის ის, რომ კორონავირუსის შემთხვევების 80%-ზე მეტი არის მსუბუქი ან საშუალო სიმძიმის, შედარებით ნაკლებ პროცენტშია გართულებული შემთხვევები, რაც უკავშირდება ძირითადად თანმხლებ დაავადებებს. ამიტომ ადამიანები, რომლებსაც აქვთ ქრონიკული დაავადებები, განსაკუთრებულად ფრთხილად უნდა იყვნენ“.

მინისტრის მოადგილემ თვითიზოლაციის მკაცრად გაკონტროლებაზე ისაუბრა და დაამატა, რომ პროცესში ჩაერთვებიან სამართალდამცავი ორგანოებიც.

„სამწუხაროდ, ყველაზე სერიოზულ გამოწვევად ჩვენთვის კვლავაც რჩება ის, რომ ადამიანი, რომლეიც მაღალი რისკის მატარებელია, იყოს თვითიზოლაციაში ან გადავიყვანოთ საკარანტინე პირობებში. კარანტინში ყოფნა, სასიამოვნო და კომფორტული არავისთვისაა, მაგრამ ეს განპირობებულია საზოგადოებრივი ჯანდაცვის ძალიან მაღალი რისკებით და ინტერესებით, რაც იცავს ყველა სხვა დანარჩენი მოქალაქეების ინტერესსა და ჯანმრთელობას. ჩვენი კანონმდებლობა უკვე განსაზღვრავს და ადგენს, რომ სხვა ადამიანის ჯანმრთელობისთვის რისკის შექმნა რეკომენდაციებზე დაუმორჩილებლობის გამო ისჯება კანონით, თუმცა ეს სასჯელი არ არის მაღალი და ამის გამოყენება ბერკეტად ნაკლებად რეალისტურია.

პროცესში ჩაერთვებიან ეპიდემიოლოგები, სამართალდამცავი ორგანოებიც, თუმცა, ნებისმიერ შემთხვევაში მოქალაქის პასუხისმგებლობა მაინც უმთავრესი და პირველია. ჯერჯერობით კონკრეტული წინადადებები ჯარიმის გამკაცრებაზე ან ქვეყანაში სანქციის შემოღებაზე იმ ადამიანის მიმართ, რომელიც არღვევს ამ წესებს, ამაზე საუბარი კონსულტაციების დონეზე მიმდინარეობს“, - განაცხადა გაბუნიამ.