UEFA-მ რუსეთს პირობითი დისკვალიფიკაცია მიუსაჯა. შესაბამისი გადაწყვეტილება ევროპის საფეხბურთო ჩემპიონატის, ევრო-2016-ის დასრულებამდე იმოქმედებს.

კერძოდ, იმ შემთხვევაში, თუ საფრანგეთში რუსი გულშემატკივრების მონაწილეობით არეულობა კვლავ მოხდება, რუსეთის ნაკრებს ჩემპიონატიდან გარიცხავენ.

UEFA-მ, ასევე, რუსეთის საფეხბურთო კავშირს 150 ათასი ევროს ოდენობით ჯარიმა დააკისრა.

შაბათს, საფრანგეთის ქალაქ მარსელში, რუსეთ-ინგლისის მატჩის შემდეგ გულშემატკივრებს შორის ფიზიკური დაპირისპირება მოხდა, რა დროსაც რამდენიმე ათეული ადამიანი დაშავდა.