ჯანდაცვის სამინისტროს ინიციატივას – „გაიღე სისხლი-გადაარჩინე სიცოცხლე“ ლენტეხის მუნიციპალიტეტის პარტია „ქართული ოცნების” აქტივისტები, მოხალისეები, საკრებულოს, მერიის თანამშრომლები და რიგითი მოქალაქეები შეუერთდნენ.

„ჩვენი ვალია, დავეხმაროთ გასაჭირში მყოფ ჩვენს მოქალაქეებს“, – განაცხადა ლენტეხის მუნიციპალიტეტის საკრებულოს თავმჯდომარე გიორგი გაზდელიანმა. საკრებულოს თავმჯდომარე განმარტავს, რომ ლენტეხის მუნიციპლიტეტში 40-მდე ბენეფიციარმა სისხლის უანგაროდ გაცემის სურვილი გამოთქვა – „მათი მიზანია, კორონავირუსით ინფიცირებულ ადამიანებს დაეხმარონ”.

აქციაზე, ასევე, იმყოფებოდა ლენტეხის მუნიციპალიტეტის მერი ბადრი ლიპარტელიანი. მისი განცხადებით, პარტია „ქართული ოცნება-დემოკრატიული საქართველოს” პოლიტიკური გუნდი ჯანდაცვის სამინისტროს წამოწყებულ ინიციატივას აქტიურად შეუერთდა და გამონაკლისი არც ლენტეხის მუნიციპალიტეტის ადგილობრივი ორგანიზაციაა.

„დღეს აქ მოვიდნენ პარტიის წევრები, მოხალისეები, აქტივისტები, ადგილობრივი თვითმმართველობების თანამშრომლები, სულ 40-მდე ადამიანი, ეს ადამიანები თავიანთ სისხლს სხვების გადასარჩენად გაიღებენ. პროცესი რეკომენდაციების სრული დაცვით და მშვიდ გარემოში მიმდინარეობს“, – განაცხადა ლენტეხის მერმა.

სისხლის უანგარო დონაცია რაჭა-ლეჩხუმ-ქვემო სვანეთის ოთხივე მუნიციპალიტეტში ჩატარდა.