„ჩვენ შორის მიმდინარეობს ძალიან სასარგებლო დისკუსიები. ჩვენ ვართ ადგილობრივი ტურისტების პირველი ნაკადის წევრები, თუ შეიძლება ასე ითქვას. ჩვენ ვიმყოფებით ლოპოტაზე, ამ ულამაზეს ადგილზე. დისკუსიები, რომლებიც ჩვენ დავიწყეთ და გავაგრძელებთ, ეხება სერიოზულ საკითხს - კორონავირუსის კრიზისის მართვას, “- ამის შესახებ ევროკავშირის ელჩმა საქართველოში კარლ ჰარცელმა, პრემიერ-მინისტრისა და საქართველოში აკრედიტებულ დიპლომატიური კორპუსის წარმომადგენლებთან შეხვედრის შემდეგ განაცხადა.

მისი თქმით, საქართველოს მთავრობამ და მოსახლეობამ ჯანდაცვასთან დაკავშირებულ ასპექტებში თავი გამოიჩინეს.

„როგორც მოგეხსენებათ, ჩვენ ხაზს ვუსვამთ იმ ფაქტს, რომ მთავრობამ და საქართველოს მოსახლეობამ თავი გამოიჩინეს ჯანდაცვასთან დაკავშირებულ ასპექტებში. თუმცა მთელ მსოფლიოში რისკები ჯერ კიდევ არსებობს: უფრო ვიწრო გაგებით ჯანდაცვასთან დაკავშირებით, მაგრამ უფრო ფართო გაგებით - სოციალური ასპექტების და ეკონომიკის აღდგენის მხრივ“, - განაცხადა კარლ ჰარცელმა.

როგორც ევროკავსირის ელჩმა აღნიშნა, ევროკავშირი საქართველოსთან მჭიდრო თანამშრომლობას  აგრძელებს.

„ჩემთვის ძალიან სასიხარულოა აქ ყოფნა ჩემს კოლეგებთან ერთად, რომლებიც წარმოადგენენ ევროკავშირის წევრ ქვეყნებს, ასევე EIB და EBRD წარმომადგენლებთან ერთად, რადგან ჩვენ ამ მუშაობაში მონაწილეობას ვიღებთ, როგორც ევროპის გუნდი. კრიზისის განმავლობაში ჩვენ მჭიდროდ ვთანამშრომლობდით მთავრობასთან. გვქონდა ძალიან ნაყოფიერი თანამშრომლობა. სიამოვნებით აღვნიშნავ, რომ ამ თანამშრომლობის შედეგად ევროკავშირმა და ევროპის გუნდმა გააკეთა გამონაკლისი და თავისი წვლილი შეიტანა ამ რთულ დროს გადატანაში. ჩვენ გავაგრძელებთ მჭიდრო თანამშრომლობას საქართველოსთან. დისკუსია, რომელიც ჩვენ გვექნება, შეეხება იმას, თუ რა ვისწავლეთ, რა დასკვნების გამოტანა შეიძლება, რადგან აქ ლაპარაკი არის არა მხოლოდ ეკონომიკაზე, არამედ სოციალურად დაუცველ ჯგუფებზე ზრუნვაზეც, როგორ არის დაცული ადამიანის უფლებები საგანგებო მდგომარეობის დროს. ძალიან მოხარული ვარ, რომ მთავრობამ დაგვპატიჟა ჩვენ ამ საკითხებთან დაკავშირებით ჩვენი მოსაზრებების გასაზიარებლად, რადგან ჩვენ ყველამ უნდა ვისწავლოთ გამოცდილებით. ეს ეხება საქართველოსაც, თუმცა, მეორე მხრივ, საქართველოს თავადაც შეუძლია, ასწავლოს სხვებს, რაზეც მეტყველებს დღემდე მიღწეული შედეგები“, - განაცხადა კარლ ჰარცელმა.