„მოდით შეცდომით დავიწყოთ, რადგან შეცდომით დაიწყო 20 ივნისი. ეს იყო პროტოკოლური შეცდომაც, მაგრამ მხოლოდ პროტოკოლური შეცდომა არ ყოფილა. ახლა ურემ ამობრუნებულზე გზა როდესაც კიდევ უფრო კარგად გამოჩნდა, უნდა ვაღიაროთ, რომ შეცდომა იყო თავად ამ ადამიანის ჩამოყვანა.  დღევანდელი გადასახედიდან, ძალიან გულწრფელი რომ ვიყო, ჩვენ ეს ადამიანი ალბათ არ უნდა ჩამოგვეშვა, მაგრამ გვაქვს ასეთი გამოცდილება - 2016 წელს საქართველოში იმყოფებოდა კოვალიოვი,  რომელიც, იყო „ეფ ეს ბეს“ წარმომადგენელი, თავის დროზე ერთ-ერთი ხელმძღვანელი და მათ შორის, კანონის დამრღვევი, ასეთი პრეცედენტები იყო, მაგრამ მიუხედავად ამისა, გავრილოვის ჩამოსვლა საქართველოში და მისი პროვოკაციული მოქმედებები ალბათ უნდა გაგვეთვალა, რთული იყო, მაგრამ უნდა გაგვეთვალა. იქ იყო საპროტესტო აქცია, მოქალაქეებისა, რომლებმაც ნახეს, რომ გავრილოვი, რუსეთის დუმის კომუნისტი დეპუტატი მოთავსდა პარლამენტის თავმჯდომარის სკამში, მათ აღარ აინტერესებდათ ეს პროტოკოლური შეცდომა იყო, ვინმემ დასვა თუ თავისთავად ჩაიდინა გავრილოვმა პროვოკაციული მოქმედება“, - ამის შესახებ პარლამენტის თავმჯდომარის მოადგილემ მამუკა მდინარაძემ ტვ „იმედის“ ეთერში განაცხადა.

მისი თქმით, ოპოზიციას სხვა დღის წესრიგი და სხვა სპეკულაციური მიზნები ჰქონდა, მაგრამ  რეალობა არის ის, რომ, თუ ხელისუფლება გათვლიდა ის კაცი პროვოკაციაზე წავიდოდა, მაშინ გავრილოვი არ უნდა ჩამოგვეშვა.

„თუ გათვლიდი ამას, მაშინ ამ შეცდომასაც არ დაუშვებდი. შარშანდელი 20 ივნისი იყო ხელისუფლების მიერ დაშვებული შეცდომა, რომელიც ბოროტულად და მავნებლურად, მიზეზად თავისი მიზნების განსახორციელებლად გამოიყენა „ნაციონალურმა მოძრაობამ“ და მისმა სხვა განშტოებებმა. მათ სცადეს, ახალგაზრდების გულწრფელი პროტესტი გადაეზარდათ თავიანთ მავნებლურ გეგმებში. სახელმწიფომ იმ დღეს თავიდან აიცილა ძალიან დიდი უბედურება, მაგრამ სამწუხაროდ თავიდან ვერ აიცილა რამდენიმე ადამიანის დაზიანება და მორალური და არა მხოლოდ მორალური ვალდებულება, მთელი ცხოვრება გვექნება ამ ადამიანების წინაშე“, - განაცხადა მამუკა მდინარაძემ.​