„ეუთო-ს რეკომენდაციები საარჩევნო სისტემის, საერთოდ, საარჩევნო ატმოსფეროს გაჯანსაღების თემას ეხება, თუ როგორი უნდა იყოს გარემო არჩევნების დროს , არჩევნების წინა პერიოდში.  სამუშაო  ჯგუფის ხელმძღვანელი პარლამენტის თავმჯდომარე არჩილ თალაკვაძე იყო და  ოპოზიციის წარმომადგენლები და უმრავლესობის წევრები ამ პროცესში მონაწილეობდნენ“, - განაცხადა ტვ „იმედის“ ეთერში პარლამენტის თავმჯდომარის პირველმა მოადგილემ, გიორგი ვოლსკიმ. მისი თქმით,  თითქმის ყველა პუნქტი შეთანხმებულია.  დარჩენილია კიდევ რამდენიმე საკითხი, რაზეც პირველი ვიცე-სპიკერი  იმედის გამოთქვამს, რომ შეთანხმდებიან. თუმცა მისივე თქმით,  პოლარიზაცია პოლიტიკურ პოზიციებს შორის დიდია და მწვავე.

„ამ პროცესებში დასავლელი პარტნიორები ჩართულნი არიან, ფასილიტატორები ანუ მოლაპარაკებების ხელშემწყობები თავის როლს ასრულებენ, ერთობლივი განცხადებებია ცალკე აშშ-ის და  გერმანიის. მაგრამ გაერთიანებული ოპოზიცია აირია. ყველა არა, რადგან ახალი ოპოზიცია კონსტრუქციული კუთხით გამოჩნდა.  მხედველობაში მყავს „ნაციონალური მოძრაობა“, „ევროპული საქართველო“ და ზოგადად, სატელიტი პოლიტიკური პარტიები. ძალიან მძიმე მდგომარეობა უნდათ, რომ შექმნან და შექმნილია კიდეც ძალიან მძიმე მდგომარეობა იმ თვალსაზრისით, რომ ეს უკვე აღარ არის პოლიტიკური პოლემიკა. სხვა სიბრტყეში გადავედით“, - აღნიშნა გიორგი ვოლსკიმ.

დღევანდელ საკონსტიტუციო ცვლილებების კენჭისყრაში მონაწილეობასთან დაკავშირებით  პირველმა ვიცე-სპიკერმა აღნიშნა, რომ  ვინმე მაინც იქნებოდა „ნაციონალური მოძრაობის“ რიგებში  ისეთი, ვინც ეტყოდათ, რომ ამ პროცესებში ჩაურთველობა პოლიტიკური თვითმკვლელობაა. 

„მაგრამ მთლიანობაში მაინც გადასწონათ იმის ცდუნებამ, რომ ისევ იმ ხაზს მისდევენ, რომ არის პოლიტიკური პატიმარი, თუმცა, პოლიტიკური პატიმრის ბედი, დარწმუნებული ვარ, რომ სულ არ აინტერესებთ, ციხეში იჯდება იგი თუ არა. მისი გარეთ გამოსვლაც ნაკლებად აწყობთ.

მთავარი, ვისთანაც პასუხს ვაგებთ, ვისთანაც ანგარიშვალდებულები ვართ, ჩვენი საზოგადოებაა, ახალგაზრდები იქნებიან თუ ხანშიშესულები ან თუნდაც ბავშვები, ვისაც ჯერ კიდევ არ აქვთ არჩევნებში მონაწილეობის მიღების უფლება. ეს არის თემა და როცა პოლიტპატიმრის თემით მანიპულირებ, ნიშნავს, რომ პერსპექტივა არ გაქვს  საზოგადოებას უკეთესი მხრიდან დაანახო შენი თავი და რადიკალურ ზომებს იმიტომ მიმართავ, რომ  იქნებ დასავლეთიდან ყურადღება მოგაქციონ, რომ საქართველოში თურმე პოლიტპატიმარი ყოფილა და თურმე ხელისუფლებას შეუძლია მითითება მისცეს სასამართლოს და გამოაშვებინოს. ეს არ არის ერთი მხრიდან გაკეთებული დარტყმები.  ერთი მიმართულებაა, რომ იქ ვაშაძე გამოდის, რომ ჩვენ უნდა მოვემზადოთ ოპოზიციაში გადასასვლელად და საკუთარ გამარჯვებაში დარწმუნებულები არიან. მეორე მიმართულებაა, რომ თითქოს  ხელისუფლებას აქვს ბერკეტი,  სასამართლოს უკარნახოს. მესამე მიმართულებაა სრული დესტრუქცია, როცა გარეთ შეკრებ სასტვენებით ხალხს და ვიღაცას ამას  დაანახებ. მეოთხე მიმართულებაა ის, რომ თურმე პანდემიამ და ვირუსმა შეიძლება გაცილებით მეტი ეკონომიკური  ზარალი მოგვაყენოს, ვიდრე ახლა ვართ . ადამიანის ჯანმრთელობა თურმე არაა მნიშვნელოვანი. ვერცერთი მიმართულებით ვერ განახორციელეს თავიანთი სტრატეგიული დესტრუქციული გეგმა“, - განაცხადა გიორგი ვოლსკიმ.

როგორც მან აღნიშნა, ბიძინა ივანიშვილის ოჯახზე შეტევებს თვითონ ივანიშვილმა უპასუხა დუმილით და ქუთაისში საერთაშორისო უნივერსიტეტის გახსნით.

„ყველაფერმა დაგვანახა, რომ არსებობს მმართველი გუნდი, რომელიც არავითარ არაფორმალური ფარდის მიღმიდან მართვას არ საჭიროებს. დარგი არ დარჩა, რომელმაც მაღალხარისხიანად არ იმოქმედა. მდგომარეობა უმძიმესია, მაგრამ პანდემიის თემის გამოყენება არ გამოუვიდათ. ვერცერთმა თემამ ვერ იმუშავა და რა დარჩენიათ? დარჩენიათ ის, რომ  დრამატიზაცია მოახდინონ ამ სიტუაციის, რომ საშინელება ხდება - გიორგი რურუა პოლიტპატიმარია და ესენი იძულებული არიან, არ მიიღონ მონაწილეობა კენჭისყრაში.  თან კიდევ ხელს გვიქნევენ, რომ არ ჩავაგდოთ საკითხი“, - აღნიშნა პირველმა ვიცე-სპიკერმა.​