ტრაგიკულად დაღუპული 19 წლის ფეხბურთელის გიორგი შაქარაშვილის და ანი შაქარაშვილი, სოციალურ ქსელში ძმის ფოტოს აქვეყნებს.

გამოქვეყნებული სურათის ქვემოთ შაქარაშვილის დედა თამუნა შალვაშვილი ტოვებს კომენტარს: „ჩემი უნაკლო“, - წერს თამუნა.

აქამდე შაქარაშვილის დედას საჯაროდ კომენტარი არ დაუფიქსირებია. მის მიმართ უცნობმა ადამიანებმა თანგრძნობა გამოხატეს და კომენტარების საშუალებით სამძიმარს უცხადებენ. სრულიად უცხო ადამიანები თამუნა შალვაშვილის გამხნევებას ცდილობენ და აღნიშნავენ, რომ მისი გაზრდილი შვილი საამაყოა.

ცნობისთვის, 19 წლის ახალგაზრდა ფეხბურთელის, გიორგი შაქარაშვილის დაკარგვის შესახებ ოჯახმა პოლიციას 19 ივნისს, 11 საათისთვის შეატყობინა. ცხედარი ოთხდღიანი ძებნის შემდეგ, მდინარე არაგვში იპოვეს. შაქარაშვილის გარდაცვალებასთან დაკავშირებით არაერთი ვერსია გაჟღერდა, თუმცა საბოლოო შედეგი გამოძიებას ჯერ არ დაუდია.

შინაგან საქმეთა სამინისტრომ გიორგი შაქარაშვილის საქმეზე 26 ივნისს 17 პირი დააკავა. უწყება არ გამორიცხავს, რომ დაკავებულ პირთა სია კიდევ გაიზარდოს, თუმცა გარდაცვალების მიზეზი ამ დრომდე უცნობი რჩება

გიორგი შაქარაშვილის საქმეზე ექსპერტიზის პასუხი 10 ივლისს გახდა ცნობილი, სადაც წერია, რომ სიკვდილის მიზეზია ასფიქსია წყალში დახრჩობით.

ამავდროულად, პროკურატურის ინფორმაციით, გიორგი შაქარაშვილის ცხედარზე აღინიშნება სიკვდილის წინა ახლო პერიოდში მკვრივი-ბლაგვი საგნის მოქმედებით მიყენებული, სიცოცხლისდროინდელი დაზიანებები შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში.

ექსპერტიზის დასკვნის მიხედვით, აღნიშნული დაზიანებები, იზოლირებულად აღებული, ატარებენ სხეულის დაზიანებათა მსუბუქი ხარისხის ნიშნებს.

წყარო :