„საშა გველესიანი იუბილარია“- პოეტი მაია კახიძე სოციალურ ქსელში წერს:

„გილოცავ, საშიკუნა! ღმერთმა არ მოგაკლოს წყალობა და სიხარული, წარმატება და სიყვარული და გიმრავლოს წლები და ოჯახი. იუბილარო, ესეც შენი ახალი ლექსი:

მოპარულ ყვავილებს

ძველ ფოტოებთან

მიფიქრია,

სიჩუმით რამდენს

მავალებენ...

ეს ქალი ისევ

სიფითრეა

და ღაწვზე წვიმის

ნაკვალევი.

ქუჩა ყვითელი

ფრაგმენტებით,

ქარი, ფოთლები

და რიარია,

ეს ქალი — ცხადის

გამეტება

და რა თამამი

სიზმარია.

გიჟმა ვარდები

შეაკრიფა

თალარს და მორთო

აივანი...

მერე წავიდა

ფეხაკრეფით,

სადღაც, სულ ახლოს,

დაივანა.

რა ამღვრეული

ნახატია

— დღე, მოყვითალო

აკვარელით...

ეს ქალი, წვიმა

და ხვატია,

გიჟის ოცნება

და საყვარელი.

ისევ თრობამდე

ცისმარეა,

ღვინობისთვეთა

ზედახორა,

ეს ქალი მაინც

სიზმარია,

ერთი მარტოობის

მეტაფორა...

ღაწვებზე წვიმის

ნაკვალევით...“