საქართველოს პრემიერ-მინისტრმა გიორგი გახარიამ, „ქართული ოცნების“ გენერალურმა მდივანმა კახა კალაძემ, პარლამენტის თავმჯდომარე არჩილ თალაკვაძემ, ბოლნისის, დმანისის, თეთრიწყაროს და წალკის მაჟორიტარი დეპუტატობის კანდიდატმა გოგი მეშველიანმა და წალკის მერმა ილია საბაძემ სოფელ იმერაში დაათვალიერეს ახლად აშენებული სკოლა, რომელშიც სარემონტო სამუშაოები მიმდინარეობს.

წალკის მუნიციპალიტეტის სოფელ იმერას ახალი სკოლის მშენებლობა 2019 წელს დაიწყო და სექტემბერში დასრულდება. სკოლა 60 მოსწავლეზეა გათვლილი. პროექტში გათვალისწინებულია შიდა და გარე სივრცეების, ასევე რეკრეაციული ზონების მოწყობა. სკოლა თანამედროვე სტანდარტების შესაბამისად შენდება და სრულად იქნება ადაპტირებული შეზღუდული შესაძლებლობების მქონე პირთათვის.

მის მშენებლობას საქართველოს მთავრობა 1,2 მლნ ლარით აფინანსებს.

„ქართული ოცნების” ლიდერები სკოლასთან შეკრებილ მოსახლეობასაც გაესაუბრნენ და ადგილობრივების საჭიროებების შესახებ ინფორმაცია პირადად მოისმინეს.