„საერთაშორისო საფინანსო ინსტიტუტებიდან საქართველო დაფინანსებას მიიღებს ეტაპობრივად, საიდანაც ნაწილი არის საქართველოს ბიუჯეტის დახმარებისთვის გათვალისწინებული და ნაწილი სხვადასხვა ინფრასტრუქტურული პროექტებისთვის“, -ასე უპასუხა საფინანსო-საბიუჯეტო კომიტეტის თავმჯდომარე ირაკლი კოვზანაძემ  სესიაზე პარლამენტის თავმჯდომარის დამაზუსტებელ კითხვას სასესხო ხელშეკრულებებთან დაკავშირებით.

„ყველა ეს 13 ხელშეკრულება, რომელიც წარმოდგენილია, შესაძლებლობას აძლევს საქართველოს მთავრობას  მოიზიდოს 694 მლნ ევროს დაფინანსება ჯამში, და გრანტი თითქმის 44 მლნ. ევრო. ეს არის შემადგენელი კომპონენტი იმისა, რაზედაც ჩვენ ვმსჯელობდით ანტიკრიზისული პროგრამის ფარგლებში“, - აღნიშნა ირაკლი კოვზანაძემ.

მისი თქმით, დღეს სესიაზე რატიფიცირებისთვის 13 სასესხო ხელშეკრულება განიხილეს.

ანტიკრიზისული გეგმიდან გამომდინარე საერთო ჯამში საუბარია 1.5 მილიარდ დოლარიან  საერთაშორისო საფინანსო დახმარებაზე

„როგორც გვახსოვს, დახმარებებიდან პირველი ტრანში 200 მილიონ დოლარზე მეტი საქართველომ საერთაშორისო სავალუტო ფონდისგან მიიღო, როგორც საბიუჯეტო დახმარება. ასევე თანხების ნაწილი მიემართება ეროვნული ბანკის რეზერვების გასამყარებლად. საერთაშორისო ფინანსური დახმარებები  გაწერილია 2020 წლის კორექტირებულ  ბიუჯეტში გარკვეული  ვალდებულებების დასაფინანსებლად. მათ შორის,   ჩვენი იმ თანამემამულეების დასახმარებლად, რომლებიც ამ პანდემიის პირობებში ყველაზე მეტად დაზარალდა“, - აღნიშნა ირაკლი კოვზანაძემ სესიის დასრულების შემდეგ თემის კომენტირებისას.​