„ქართული ოცნება - დემოკრატიული საქართველოს“ ქუთაისის მერობის კანდიდატი იოსებ ხახალეიშვილი მოქალაქეებთან ინდივიდუალური შეხვედრების ფარგლებში დღეს ავტოქარხნის ადმინისტრაციულ ერთეულში - ფურცელაძის, გუნიას, სააკაძისა და ბელიაშვილის ქუჩების მოსახლეობას შეხვდა.

როგორც მერობის კანდიდატმა აღნიშნა, მოქალაქეებისგან ეტაპობრივად ეცნობა იმ პრობლემებს, რომელიც მერად არჩევის შემდეგ უნდა მოაგვაროს.

„არის მოსახლეობის გარკვეული ნაწილი, რომელიც ფიზიკურად ვერ ახერხებს შეხვედრებზე მოსვლას  სხვადასხვა ობიექტური მიზეზების გამო. იმისათვის, რომ თითოეული მოქალაქისთვის ხელმისაწვდომი იყოს ინფორმაცია ჩვენი გუნდის და კანდიდატების შესახებ, რამდენიმე ოჯახს ვესტუმრე,  ჩვენი გუნდის  სამომავლო გეგმებზე  ვესაუბრე  და მათ წინაშე არსებულ პრობლემებს გავეცანი, რომელიც მერად არჩევის შემდეგ უნდა მოვაგვარო. გულწრფელად მახარებს, რომ თითოეულ ოჯახში ჩემ მიმართ  ქუთაისური სითბო დამხვდა.  მე მჯერა ამ ადამიანების, მჯერა ჩემი ქუთაისელების, რომ ისინი სწორ არჩევანს გააკეთებენ“, - განაცხადა იოსებ ხახალეიშვილმა.