სტამბოლის ათათურქის საერთაშორისო აეროპორტმა მუშაობა განაახლა.

თურქეთის პრემიერ-მინისტრმა ბინალი ილდირიმმა აეროპორტში განაცხადა, რომ აეროპორტმა ავიარეისების მიღება და გაშვება უკვე დაიწყო.

„საგამოძიებო მოქმედებები ისევ გრძელდება, თუმცა აეროპორტი გახსნილია და საჰაერო მიმოსვლა აღდგა", - აღნიშნა ბინალი ილდირიმმა.

ბოლო მონაცემებით, ათათურქის სახელობის აეროპორტში მომხდარ ტერაქტებს სულ მცირე 50-მდე ადამიანი ემსხვერპლა. დაშავებულია 150-მდე ადამიანი, აქედან ექვსის მდგომარეობა მძიმეა.

პასუხისმგებლობა მომხდარისთვის ჯერჯერობით არც ერთ დაჯგუფებას არ აუღია.