„რუსთვი 2"-ის დაკვეთით ჩატარებულ კვლევის შედეგებს სიცრუის ტირაჟირებად აფასებს „ახალგაზრდული ცენტრის" წევრი დავით ჩიხელიძე.

მისი აზრით, ძნელია, სერიოზულად შევხედოთ GFK-ს კვლევას.

„ვიცი რა მათი წარსული საქმიანობა, ამ  კომპანიის კომპეტენცია ჩემში ეჭვს ბადებს და მიჩენს უამრავ კითხვას.  

2012 წლის საპარლამენტო არჩევნების დროს აღნიშნულმა კომპანიამ კვლევა „საზოგადოებრივი მაუწყებლის" დაკვეთით ჩაატარა. 

GFK-ს მაშინდელი მონაცემებით, კოალიცია „ქართული ოცნების" რეიტინგი 33% იყო, ასევე 33% ჰქონდა „ნაციონალური მოძრაობას", თუმცა ცენტრალური საარჩევნო კომისიის მიერ გამოქვეყნებული 2012 წლის საპარლამენტო არჩევნების საბოლოო შედეგების მიხედვით „ქართულმა ოცნებამ" ამომრჩეველთა ხმების 54,9%, „ნაციონალურმა მოძრაობამ" კი 40,4% მიიღო.

2012 წლის არჩევნებზე GFK-ს მიერ ჩატარებული კვლევის შედეგებსა და ცესკო-ს ოფიციალურ  შედეგებს შორის სხვაობა 21.9% იყო.  დამეთანხმებით, რომ კომპანია, რომელსაც პრეტენზია  მაღალ კვალიფიციურობაზე აქვს, მსგავს ცდომილებას არ უნდა უშვებდეს.

მნიშვნელოვანია ვიცოდეთ, რომ 2012 წელს, ოფიციალური განცხადებით, კვლევის ცდომილება უნდა ყოფილიყო 3% (რეალურად 21.9% იყო),  დღეს კი გვითხრეს, რომ კვლევის ცდომილება გახლავთ 2,02%, საინტერესო იქნება, ვიცოდეთ, რა ფაქტორების გათვალისწინებით დაიწია ცდომილებამ 1%-ით?

ჩვენთვის ასევე უცნობია, სად ჩატარდა საველე სამუშაოები. რა მეთოდოლოგიით მოხდა გამოკითვა? რა პრინციპით იქნა შერჩეული ფოკუს-ჯგუფები? როგორი იყო ასაკობრივი ზღვარი და ა.შ.

იმავე 2012 წელს იყო რამდენიმე  ორგანიზაცია,  რომლის კვლევის შედეგებიც ახლოს  იყო  რეალობასთან  და რომელთა ცდომილებაც მართლაც მერყეობდა 1-2% შორის,  საინტერესოა, დღეს რატომ არავინ უკვეთავს ამ კომპანიებს კვლევებს? მათ ხომ საქმით დაამტკიცეს საკუთრი პროფესიონალიზმი? სამწუხაროდ, კვლევის დამკვეთთა მიზანია და სურვილია   საზოგადოებრივი აზრის ფორმირება და   არა მოსახლეობისთვის  რეალური შედეგის ჩვენება", - აცხადებს ჩიხელიძე.