აჭარის მთავრობის თავმჯდომარე თორნიკე რიჟვაძე საზღვაო რეგიონების ასოციაციის ვიცე-პრეზიდენტად აირჩიეს.

როგორც აჭარის მთავრობაში აცხადებენ, თორნიკე რიჟვაძე ვიცე-პრეზიდენტის პოსტს ორი წლის ვადით დაიკავებს. თორნიკე რიჟვაძის კანდიდატურა აღნიშნულ პოსტზე ორგანიზაციის პოლიტიკურ ბიუროზე დაამტკიცეს. პროცესი დღეს ონლაინრეჟიმში წარიმართა.

მათივე ინფორმაციით, CPMR-ის წარმომადგენლობა მოიცავს დაახლოებით 200 მილიონ ადამიანს და იგი მნიშვნელოვან როლს ასრულებს ევროპისა და მისი მეზობელი რეგიონების მეტად დაბალანსებული განვითარების სასარგებლოდ. ორგანიზაციის სათაო ოფისი მდებარეობს ბრიუსელში.

„ევროკავშირის ინსტიტუტებსა და ეროვნულ მთავრობებში კონტაქტების ფართო ქსელის საშუალებით, ასოციაცია უზრუნველყოფს მისი წევრი რეგიონების საჭიროებების და ინტერესების გათვალისწინებას რეგიონული ზემოქმედების მქონე პოლიტიკებში.

ასოციაცია მუშაობს როგორც სამეცნიერო ცენტრი, სხვადასხვა დარგობრივი და ინოვაციური განვითარებისთვის იდეებისა და პროექტების შემუშავების მიმართულებით და ამასთან საერთაშორისო დონორ ორგანიზაციებსა და ევროკავშირის ძირითად ინსტიტუტებთან აქტიურად ლობირებს რეგიონების მდგრადი განვითარებისათვის საჭირო ფინანსური წყაროების მოძიებისა და მოპოვებისათვის.

საზღვაო რეგიონების ასოციაცია 1973 წელს დაარსდა და ამჟამად 150 რეგიონს აერთიანებს ევროპისა და მის ფარგლებს გარეთ არსებული ქვეყნებიდან. გაერთიანება ფოკუსირებულია სოციალურ, ეკონომიკურ და ტერიტორიულ ერთობაზე, საზღვაო პოლიტიკასა, ლურჯი ეკონომიკის ზრდასა და ხელმისაწვდომობაზე. ევროპული მმართველობა, მწვანე ენერგეტიკა, კლიმატის ცვლილება და მდგრადი სამეზობლო განვითარება ასევე წარმოადგენს ასოციაციის საქმიანობის მნიშვნელოვან სფეროებს“, – აცხადებენ აჭარის მთავრობაში.

წყარო :