მთელი ქვეყნის მასშტაბით რესტორნები დღეიდან 22:00 საათამდე იმუშავებენ. ამის შესახებ უწყებათაშორისი საკოორდინაციო საბჭოს სხდომის დასრულების შემდეგ ვიცე-პრემიერმა მაია ცქიტიშვილმა განაცხადა.

„თბილისში, ქუთაისში, მცხეთაში და ბათუმში რესტორნების მუშაობა იყო შეზღუდული 22:00 საათიდან. თუმცა, იმის გათვალისწინებით, რომ იქ გამართული ღონისძიებებისა და წვეულებების დროს შეინიშნება ინფიცირების მაღალი რაოდენობა, ამიტომ ჩვენ მივიღეთ გადაწყვეტილება, რომ რესტორნებმა მთელი ქვეყნის მასშტაბით იმუშაონ 22:00 საათამდე", - განაცხადა ცქიტიშვილმა, რომელმაც მოქალაქეებს შეახსენა, რომ თავყრილობებთან მიმართებაში ასევე მოქმედებს 10 კაცზე მეტის შეკრების აკრძალვა.