პოლიტოლოგი, ექსპერტი უსაფრთხოების საკითხებში, ვახტანგ მაისაია აცხადებს, რომ ქვეყანაში ღრმა პოლიტიკური კრიზისია. მაისაიამ საპარლამენტო არჩევნების შემდეგ ქვეყანაში განვითარებული პროცესები მედიაჰოლდინგ „კვირას“ პრესკლუბში გამართულ პრესკონფერენციაზე შეაფასა.

„სიტუაცია საკმაოდ რთულია იმიტომ, რომ აშკარად ქვეყანაში ღრმა პოლიტიკური კრიზისია. ამას არცერთი მხარე არ უარყოფს. იმას, რომ ვადამდელი საპარლამენტო არჩევნები იქნებოდა რეალობა, ჯერ კიდევ მაისში ვამბობდი. სამწუხარო რეალობა ისეთია, რომ, როგორც ჩანს, ეს პროგნოზი მართლდება. ამ ეტაპზე ასეა. ამას თავის საფუძველი აქვს: საპარლამენტო მართვის ფორმას ასეთი ხასიათი აქვს, მისთვის ხშირი საპარლამენტო არჩევნები და პოლიტიკური კონსენსუსის მიღწევა ძალიან რთული პრობლემაა არა მარტო ჩვენი ქვეყნისთვის, არამედ – კარგა ხნის დემოკრატიის ქვეყნებისთვისაც კი. მეორე მომენტი: საქართველოს უკვე ჰქონდა საპარლამენტო მმართველობის გამოცდილება, მაშინაც სერიოზული კრიზისი იყო. მხედველობაში მაქვს 1992-1995 წლების პარლამენტი. მესამეც: როცა საქართველოში, სამწუხაროდ, დაბალი პოლიტიკური კულტურა არსებობს და საერთოდ არ არსებობს კლასიკური პოლიტიკური პარტიების მოდელი, პარტიებისთვის არის პრობლემატური, იყვნენ თავის სიმაღლეზე, ჰქონდეთ პოლიტიკური პარტიისთვის დამახასიათებელი ყველა ატრიბუტი, ამ პირობებში ასეთი სცენარის განვითარება სავსებით ლოგიკური იქნებოდა. ეს არის ის სამი ძირითადი ფაქტორი, რის გამოც თავის დროზე ეს ვარაუდი გამოვთქვი“, – განაცხადა მაისაიამ.

მან გუშინ ღამით ცესკო-სთან მიმდინარე აქციის შესახებ ისაუბრა და განაცხადა, რომ მომხდარზე პასუხისმგებლობა ორივე მხარეს ეკისრება.

„გუშინდელი სიტუაციიდან გამომდინარე, როგორც ჩანს, ჩვენს ტრაგიკულ შეცდომებზე ვერ ვსწავლობთ. მე ყურადღებას გავამახვილებდი სხვა მომენტებზე. გუშინ ვერ ვიგრძენი, რომ გვყავდა ხელისუფლება. რა მაქვს მხედვლობაში: როცა ასეთი რთული ვითარებაა, არ აქვს მნიშვნელობა, ვის მიერაა დაწყებული ასეთი პროცესები, იმ პირობებში, როცა პარლამენტი არაა ჯერ სამართლებრივად შემდგარი ინსტიტუტი და არსებობს კრიზისის ფორმები, თავის თავზე უნდა აიღოს და გამოვიდნენ მთავრობის წევრები: პრემიერმინისტრი, შს მინისტრი და ა.შ. გუშინ ვიხილეთ, რომ ხელსუფლების წარმომადგენელი იყო მხოლოდ სახალხო დამცველი – ნინო ლომჯარია. ნაკლებად მაინტერესებს, რა კომენტარებს გააკეთებს მმართველი პარტიის წარმომადგენელი, რომელსაც არც სამართლებრივი, არც პოლიტიკური ლეგიტიმაცია აქვს იმიტომ, რომ პარლამენტის ლეგიტიმაცია ჯერ შემდგარი ფაქტი არაა. როცა ასეთი მძიმე სიტუაციაა, ყველა თავის სიმაღლეზე უნდა იყოს. ამ შემთხვევაში ლეგიტიმაცია, პირველ ყოვლისა, აქვს მთავრობას.

გიორგი გახარია, რომელიც საკმაოდ ეფექტიანი მმართველია, 20 ივნისის ტრაგიკული მოვლენების დროს იდგა თავის სიმაღლეზე, გამოვიდა – გააკეთა განცხადება. მაშინ რა ტრაგიკული მომენტებიც იყო, ყველამ ვიცით. ორივე მხარის ბრალიც იყო. პირველ ყოვლისა, როცა ხდება პარლამენტის შენობის აღება, ეს სახელმწიფო სტრატეგიული ობიექტია და აქ ცერემონიებს არავინ დაუწყებს, არ მისცემს საშუალებას, აღებული იქნას სახელმწიფო ორგანო. ეს აჩენდა გარკვეულ კითხვებს, ვის დასჭირდა ასეთი ქმედების განხორციელება. ერთია, რომ პოლიტიკური ნების გამოხატვა კონსტიტუციური უფლებაა, მაგრამ როცა ხდება სტრატეგიულ პოლიტიკურ ობიექტზე უკანონო შესვლა ან შეღწევა, ეს, დაახლოებით იგივე სცენარია, რაც 2003 წლის „ვარდების რევოლუციის“ პერიოდში განხორციელდა. მეორე მომენტია, როცა ასიმეტრიული ძალა იქნა გამოყენებული, განსაკუთრებით – აქციის დაშლის მეორე და მესამე ეტაპის დროს.

გუშინაც დაახლოებით იგივე სიტუაცია ვიხილეთ – როცა საპოლიციო ძალებსა და მომიტინგეებს შორის, ფაქტობრივად, თანაფარდობა თანაბარი იყო, საპოლიციო ძალებს შეეძლოთ, გამოეყენებინათ ადეკვატური მეთოდები – მოექსტრემისტო პირების ერთგვარი განეიტრალება განეხორციელებინათ, დაეკავებინათ. პასუხისმგებლობა ორივე მხარეს ეკისრება. განსაკუთრებით მაშინ, როცა იყო მცდელობა, მომხდარიყო ჯებირის გარღვევა და შენობაში შეჭრა, აქ პასუხისმგებლობა ოპოზიციის ლიდერებს ეკისრებათ“, – განაცხადა მაისაიამ.

მისივე თქმით, ბოლო დღეებში ერთერთი სატელევიზიო არხზე ტელეწამყვანი ოპოზიციის წარმომადგენლებს ინსტრუქციებს აძლევდა იმის შესახებ, თუ როგორ უნდა მოახდინონ გადატრიალება.

„ასევე, მინდა, ყურადღება გავამახვილო მასმედიაზე. გასაგებია, რომ მასმედია დღეს პოლარიზებულია. ერთერთ სატელევიზო, პროპაგანდისტულ არხზე დისკრედიტებული, ყოფილი ჩინოვნიკი გამოდის და ინსტრუქციებს აძლევს ოპოზიციის წარმომადგენლებს, თუ როგორ უნდა მოახდინონ გადატრიალება, ძალოვანი სტრუქტურის წარმომადგენლები როგორ გადმოიბირონ. ეს უკვე პირდაპირი მოწოდებაა გადატრიალების სცენარისკენ. ადამიანი ამბობს, რომ ის არის ტელეწამყვანი და ჟურნალისტი და ამ დროს არღვევს ჟურნალისტიკის ეთიკის ელემენტარულ წესებს. მე უსაფრთხოების სპეციალისტი ვარ და ვიცი, რაზეც ვსაუბრობ. ადამიანი ეუბნებოდა პოლიტიკოსებს, რომ ძალოვანი სტრუქტურების წარმომადგენლებზე უნდა იმუშაოთო, უნდა გადმოიბიროთო. ეს იყო პირდაპირ ეთერში. მედიას მოვუწოდებ, თავი შეიკავოს ასეთი უპასუხისმგებლო განცხადებებისგან ან ასეთ ადამიანებს მიუთითონ თავის ადგილი, სადაც საჭიროა. მაშინ ჩამოყალიბდნენ, ისინი არიან რევოლუციური შტაბი თუ დამოუკიდებელი მასმედია?“ – განაცხადა მაისაიამ.

წყარო :