„მაიკ პომპეოს ვიზიტის წინ აშშ-ის სენატის ასიგნების კომიტეტმა, საქართველოს უპრეცედენტოდ მაღალი დახმარება დაუმტკიცა. გაზრდილი დახმარება არის პირდაპირი პოლიტიკური გზავნილი, რომ საქართველოსა და აშშ-ს პოლიტიკური პარტნიორობა ვითარდება“, - ამის შესახებ „ქართული ოცნების“ ოფისში გამართულ ბრიფინგზე პარლამენტის კვლევითი ცენტრის დირექტორმა, მმართველი პარტიის საარჩევნო სიის მეთვრამეტე ნომერმა გიორგი ხელაშვილმა განაცხადა.

„ეს არის ისტორიული მაქსიმუმი $132 მილიონზე მეტი, უპრეცედენტო დახმარება საქართველოსთვის. ამას ძალიან ვაფასებთ. საქართველოს ეკონომიკისთვის მნიშვნელოვანია ეს თანხა, განსაკუთრებით COVID19-ის პანდემიის პირობებში“, - აღნიშნა ხელაშვილმა.

მისი თქმით, პარტნიორებს შორის ურთიერთობა მომდევნო ოთხი წლის განმავლობაში გადავა თვისობრივად ახალ დონეზე.

„გახსოვთ ალბათ სპეკულაციები საქართველოსთვის ლამის სანქციების დაწესების თაობაზე. როგორც იცით,ოპონენტების ძალისხმევით, აშშ-ს დახმარების პროექტში დროებით გაჩნდა ჩანაწერი ამ დახმარების 15%-ის შესაძლო შეყოვნების თაობაზე. საბოლოო დოკუმენტში ეს დათქმა მთლიანადაა ამოღებული, რაც ნიშნავს, რომ ამერიკის შეერთებული შტატები აღიარებს საქართველოს სწორი გზით განვითარებას და მხარს უჭერს იმ დემოკრატიულ პროცესებს რომლებიც საქართველოში უწყვეტად მიმდინარეობს“, - განაცხადა გიორგი ხელაშვილმა.