„ოპოზიციის განცხადება, რომ არ მონაწილეობენ მეორე ტურში, არის როგორც ფაქტობრივი, ასევე სამართლებრივი ბლეფი“, - ამის შესახებ „ქართული ოცნების“ ერთ-ერთმა ლიდერმა თეა წულუკიანმა ბრიფინგზე განაცხადა.

მისი თქმით, საქართველოს კანონმდებლობა არ ითვალისწინებს იმას, რომ მეორე ტურში რომლიმე პარტიამ აღარ მიიღოს მონაწილეობა.

„მეორე ტურზე ძალიან მნიშვნელოვანია, რომ თითოეულ ამომრჩეველს, ვის მხარდამჭერადაც არ უნდა მოიაზრებოდეს, ავუხსნათ, რომ ოპოზიციის განცხადება, რომ არ მონაწილეობენ მეორე ტურში, არის როგორც ფაქტობრივი, ასევე სამართლებრივი ბლეფი. ჩვენი კანონმდებლობა არ ითვალისწინებს იმას, რომ მეორე ტურში ვინმემ აღარ მიიღოს მონაწილეობა. თქვენ როდესაც მიბრძანდებით საარჩევნო ურნასთან, იქ, რა თქმა უნდა, იქნება 5-იანი, ხუთოსანი პარტია, იქ იქნება 41-ის, ანუ „ქართული ოცნების“ კანდიდატი ან სხვა კანდიდატი, რომელიც „ქართული ოცნების“ კანდიდატთან ერთად „ნაციონალური მოძრაობის“ ნაცვლად გავიდა მეორე ადგილას. ამიტომ არჩევანის საშუალებას, რა თქმა უნდა, როგორც მანამდე უზრუნველყოფდა ხელისუფლება და შესაბამისი სახელმწიფო ინსტიტუტები, მეორე ტურზეც, რა თქმა უნდა, თქვენ გექნებათ არჩევანი.

მინდა, „ქართული ოცნების“ მხარდამჭერებს მოვუწოდო უპრეცედენტო მობილიზაციისკენ, რადგან მეორე ტური არის ძალიან მნიშვნელოვანი არჩევნების დღე და კარგი იქნება, თუ ოპოზიციის ამომრჩეველიც გამოვა და მათთვის სასურველ კანდიდატს მისცემს ხმას. შესაბამისად, მეორე ტური შედგება და ბლეფია იმის მტკიცება, თითქოს თუკი ისინი იტყვიან, აღარ გვინდა მეორე ტური, მეორე ტური არ ან ვერ შედგება. ეს არის, რაც მეორე ტურზე ამ დღეებში ხმამაღლა უნდა ითქვას. ფაქტობრივად კი ჩვენ ბევრჯერ ვთქვით, გვაქვს ინფორმაცია, რომ ისინი თავიანთ პარტაქტივთან, მხარდამჭერებთან, რა თქმა უნდა, ჩუმად მუშაობენ, რომ მიიყვანონ და ხმა მიაცემინონ არჩევნებზე, რაც პრინციპში, დასამალი არ არის და კარგია, თუ ამას ხმამაღლაც იტყვიან“, - განაცხადა თეა წულუკიანმა.

წყარო :