„პანდემიასთან ბრძოლის დროს რომელიმე ერთი მიდგომა- მხოლოდ ჯანდაცვის სექტორის გაძლიერება, ან მხოლოდ შეზღუდვები, ან სხვა მექანიზმები შედეგს არ მოგცემს. ყველაფერი უნდა იყოს ერთიანად, მაგრამ ბალანსირებული“, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.

მისივე თქმით, გარკვეულწილად, შეიცვალა სლოგანი, რომ ადამიანებმა კორონავირუსთან ერთად ცხოვრება უნდა ისწავლონ. როგორც გამყრელიძემ აღნიშნა, სრული ლოკდაუნი არ იგეგმება, მაგრამ შეზღუდვები გაფართოვდება.

„ყველა ქვეყანას, მათ შორის ჩვენც, გაზაფხულზე გვქონდა უფრო მკაცრი შეზღუდვები, რასაც ლოკდაუნს ვეძახით, როდესაც ადამიანი გარეთ არ გამოდიოდა და ეს მექანიზმი ბევრმა ქვეყანამ გამოიყენა. ზოგიერთმა ქვეყანამ ეს ახლაც გამოიყენა. შემდეგ ჩვენ გარკვეულწილად შევცვალეთ და მთელმა მსოფლიომ შეცვალა სლოგანი. ჩვენ რომ გვეგონა, ინფექცია, როგორც სხვა რესპირატორული ინფექციები გაქრებოდა ზაფხულში, თბილ პერიოდში და ასე შემდეგ, სინამდვილეში, ასე არ აღმოჩნდა, „კოვიდ-19“  ბევრად ვერაგი აღმოჩნდა, ვიდრე ფიქრობდნენ მეცნიერები და ყველა გაზაფხულზე. ამიტომაც შეიცვალა გარკვეულად, რომ ის არ გაქრებოდა არც სამი თვე, არც ხუთ, ექვს და არც წელიწადში. ეს ყველამ დავინახეთ, ამიტომაც შეიცვალა სლოგანი, რომ ჩვენ უნდა ვცხოვრობდეთ და ვისწავლოთ თანაცხოვრება კორონავირუსთან ერთად, რათა მან ადამიანის ჯანმრთელობას და მეორე მხრივ, ეკონომიკას ნაკლები ზიანი მიაყენოს. ამიტომ, სრული ლოკდაუნები ჩვენთან აღარ არის, მაგრამ აუცილებლად იქნება გაფართოებული შეზღუდვები“, – განაცხადა ამირან გამყრელიძემ.