„ოპოზიციის წარმომადგენლებმა, პირველ რიგში მათ, კარგად იციან, რომ დამარცხდნენ კონკურენტულ ორთაბრძოლაში, მაგრამ კვლავ სიცრუით და ძალადობით ცდილობენ შეცვალონ მათთვის არასახარბიელო რეალობა“, - ამის შესახებ პარლამენტის თავმჯდომარის მოადგილემ კახა კუჭავამ 3 დეკემბერს გამართულ ბრიფინგზე განაცხადა. 

კახა კუჭავა NATO-ში, ონლაინ რეჟიმში გამართულ საგარეო საქმეთა მინისტრების შეხვედრას გამოუხმაურა.

მისი თქმით, მინისტერიალმა ერთხმად დაამტკიცა NATO-საქართველოს არსებითი გაძლიერებული პაკეტი და ასევე, მინისტერიალზე მოიწონეს NATO-ს 2030-ის სტრატეგია.

კუჭავას განმარტებით, ქვეყნის მოკავშირეებსა და მთავარ პარტნიორებზე მუდმივად მიმდინარეობს შეტევები „ნაციონალური მოძრაობის“ მხრიდან.

„ჩვენ მოვისმინეთ NATO-ს გენერალური მდივნის მაღალი შეფასებები NATO-საქართველოს არსებითი პაკეტის დამტკიცებასთან დაკავშირებით. ეს წარმოადგენს კიდევ ერთ მნიშვნელოვან ნაბიჯს იმ მიზნის მისაღწევად, რასაც ჰქვია საქართველოს ევროატლანტიკური ინტეგრაცია. ყოველივე ამის ფონზე არ წყდება შეტევები ჩვენი მთავარი მოკავშირეებისა და სტრატეგიული პარტნიორების მიმართ და ამას ახორციელებს პრო-დასავლურობას ამოფარებული, მთავარი ანტისახელმწიფოებრივი და დესტრუქციული ძალა ქართულ პოლიტიკაში.

ცხადია, ჩვენ ვსაუბრობთ „ნაციონალურ მოძრაობაზე“, რომელიც მას შემდეგ, რაც ყოველ ჯერზე მარცხდება ქართველი ხალხის მიერ, არა მხოლოდ სახელმწიფო ინსტიტუციებზე მიაქვს იერიში, არამედ შეუნიღბავად ესხმის თავს ქვეყნის სტრატეგიულ მოკავშირეებსაც. ჩვენ გვახსოვს მათი კრიმინალური წარსულის მქონე ლიდერების ღია თავდასხმები საერთაშორისო დამკვირვებლებზე, ევროპულ ინსტიტუტებზე, ევროსაბჭოსა და სტრასბურგის სასამართლოზე. ბევრი მაგალითი არსებობს მსგავსი ფაქტების გამოვლენის. ამ ტიპის განცხადებები ყოველ ჯერზე გვარწმუნებს, რომ მიხეილ სააკაშვილი და „ნაციონალური მოძრაობა“ თანმიმდევრულად ყალიბდება მთავარ ანტიდასავლურ ძალად საქართველოში“, - აღნიშნა კუჭავამ.

მისივე თქმით, ის ძალადობრივი ქმედებები, რომელიც განხორციელდა ცესკოსა და სასამართლოზე, ვერ იქნება შეფასებული დემოკრატიისა და კანონიერების დაცვად. მისთვის გაუგებარია, თუ რატომ ესხმის თავს „ნაციონალური მოძრაობის“ წევრი ნიკა მელია აშშ-ის ელჩს საქართველოში კელი დეგნანს, რომელიც, მისივე თქმით, ქვეყნის დამოუკიდებლობის მხარდამჭერია.

„ერთ-ერთი ტელევიზიის პირდაპირ ეთერში ჩვენ მოვისმინეთ „ნაციონალური მოძრაობის“ პოლიტიკური საბჭოს წევრის, ძალადობასა და კრიმინალში არაერთგზის მხილებული ნიკა მელიას განცხადებები, რომელმაც ტოლობის ნიშანი დასვა ამერიკის შეერთებული შტატებსა და ოკუპანტ რუსეთს შორის და ანტიდასავლური პროპაგანდის საუკეთესო ტრადიციებში დაესხა თავს ჩვენი სტრატეგიული მოკავშირის საელჩოს და უშუალოდ ელჩს, ქალბატონ დეგნანს, რომელსაც ფასდაუდებელი წვლილი შეჰქონდა და შეაქვს ქვეყნის ევროატლანტიკური კურსის რეალიზაციაში, არის ჩვენი თავისუფლების და დამოუკიდებლობის მხურვალე მხარდამჭერი და რომელიც დღესაც ძალისხმევას არ იშურებს არჩევნებში დამარცხებული ოპოზიციის მიერ ხელოვნურად შექმნილი პოლიტიკური კრიზისის განმუხტვაში. საინტერესოა და კითხვა ჩნდება, თუ რას უწუნებს „ნაციონალური მოძრაობა“ და მისი ვითომ ევროპელი ლიდერები ამერიკის ელჩს და რა ტიპის ქმედებებში ითხოვენ მათ მხარდაჭერას? რა თქმა უნდა, მათი სურვილი შეიძლება იყოს, რომ ყველა ის უკანონო ქმედება, რომელიც მათ განახორციელეს - ძალადობრივი შეტევები პარლამენტზე, ცესკოზე, სასამართლოს მიერ აღმკვეთი ღონისძიების ფორმად დადგენილი სამაჯურის დემონსტრაციულად მოხსნა, რომ იქნას შეფასებული დემოკრატიისა და კანონიერების დაცვად, თუმცა, ეს ასე ვერ იქნება. ასეთი ადამიანები, თავს უფლებას აძლევენ, თავისუფალი სამყაროს ლიდერების სრულუფლებიან წარმომადგენლებს დაესხან თავს და მოსთხოვონ მას თავისუფალ არჩევნებში გამარჯვებული დამარცხებულად გამოაცხადოს, ხოლო დამარცხებული გამარჯვებულად სცნოს“, - განმარტა კუჭავამ.

ბრიფინგზე, კახა კუჭავამ მოუწოდა პოლიტიკურ სუბიექტებს, საერთაშორისო და არასამთავრობო ორგანიზაციებსა და საზოგადოებას გამოხატონ საკუთარი პოზიცია „ნაციონალური მოძრაობის“ მიერ ქვეყანაში ანტიდასავლური განწყობების დათესვის ფაქტებთან დაკავშირებით და თავი შეიკავონ ქვეყნის სტრატეგიულ პარტნიორებზე თავდასხმებისგან:

„თავად ოპოზიციის წარმომადგენლებმა, პირველ რიგში მათ, კარგად იციან რომ დამარცხდნენ კონკურენტულ ორთაბრძოლაში, მაგრამ კვლავ სიცრუით და ძალადობით ცდილობენ შეცვალონ მათთვის არასახარბიელო რეალობა და უტიფრად ითხოვენ ამაში მხარდაჭერას ჩვენი სტრატეგიული მოკავშირეების მხრიდან. საზოგადოებას კარგად მოეხსენება, რომ მიმდინარე წლის განმავლობაში, ჩვენ არაერთი ნაბიჯი გადავდგით პოლიტიკური პროცესების დეპოლარიზაციის და დეესკალაციის მიზნით, მათ შორის საერთაშორისო პარტნიორების რეკომენდაციით და ყველას მივეცით შანსი დესტრუქციის და ძალადობის მაგივრად, ჯანსაღ პოლიტიკურ პროცესს დაბრუნებოდნენ. ამ ყველაფრის გათვალისწინებით, ოფიციალურად გვსურს, მოვუწოდოთ ყველა პოლიტიკურ სუბიექტს, საერთაშორისო და არასამთავრობო ორგანიზაციებს, მთელ საზოგადოებას - გამოხატონ საკუთარი პოზიცია „ნაციონალური მოძრაობის“ მიერ ქვეყანაში ანტიდასავლური განწყობების დათესვის უკიდურესად სახიფათო ფაქტებთან დაკავშირებით და კიდევ ერთხელ მოვუწოდებთ ყველას, თავი შეიკავონ ჩვენს სტრატეგიულ პარტნიორზე თავდასხმებისგან“, - განაცხადა კახა კუჭავამ.