„ტესტირების რაოდენობა გაიზარდა და შემთხვევების რაოდენობა ისევ ისეთია, როგორიც იყო მასობრივ ტესტირებამდე, რაც ნიშნავს, რომ შეზღუდვები მუშაობს“, – ამის შესახებ ნორვეგიის სამეფოს ჯანდაცვის სამინისტროს უფროსმა მრჩეველმა, ზაზა წერეთელმა, პრემიერ-მინისტრსა და ჯანდაცვის სფეროს ექსპერტებს შორის გამართული შეხვედრის შემდეგ განაცხადა.

მისი თქმით, შეზღუდვების პირველი შედეგები აჩვენებს, რომ დაიწყო პირველი ეფექტის გამოვლენა.

„შეზღუდვების ეფექტი გამოჩნდება დაახლოებით 14 დღიდან. ანუ ჩვენ ახლა მივუახლოვდებით 14-15 დღეს, რომ დავინახოთ, თუ როგორი ეფექტი აქვს ამ შეზღუდვებს. პირველი შედეგები გვაჩვენებს, რომ მატება აღარ გვაქვს ისეთი ციცაბო, როგორც აქამდე იყო, რაც იმის მანიშნებელია, რომ შეზღუდვებმა დაიწყო პირველადი ეფექტის გამოვლენა. ყველას გვახსოვს, რომ შავი პარასკევის დროს უამრავი ადამიანი მიაწყდა მაღაზიებს და ვვარაუდობთ, რომ ამან შესაძლოა, დაღი დაასვას ამ შეზღუდვებს, მაგრამ დინამიკა პოზიტიურია, ამის ეფექტი ჩანს და მკაფიოდ გამოჩნდება მომდევნო დღეებში“, – განაცხადა ზაზა წერეთელმა.

რაც შეეხება მასობრივ ტესტირებებს, ზაზა წერეთელი მიიჩნევს, რომ ეს მნიშვნელოვანი და კარგი ღონისძიებაა, განსაკუთრებით, შეზღუდვების პარალელურად.

„რაც შეეხება მასობრივ ტესტირებებს, ეს მნიშვნელოვანი და კარგი ღონისძიებაა, განსაკუთრებით ახლა, შეზღუდვების პარალელურად, რადგან ეს გვაძლევს შესაძლებლობას, უფრო ფართოდ მოვიცვათ მოსახლეობა და გავიგოთ, როგორი არის ინფიცირების მდგომარეობა საქართველოში. მასობრივი ტესტირებისას გამოვლენილი ადამიანების თვითიზოლაციაში გადაყვანა და კონტაქტების გარკვევა დაგვეხმარება, რომ შევამციროთ ამ ვირუსის გავრცელება. ალბათ კარგი იქნება, კიდევ უფრო გავზარდოთ ტესტების რაოდენობა და მოვიცვათ რაც შეიძლება მეტი ადამიანი. კარგი იქნება, რომ შეფერხება არ იყოს ტესტირების პროცესში და ჩატარდეს ისე, რომ ყველა სამედიცინო დაწესებულება მზად იყოს, მიიღოს მოსახლეობა და ჩაატაროს ტესტირება. შეზღუდვების ეფექტი ჩანს იქიდანაც, რომ ტესტირების რაოდენობა გაიზარდა და შემთხვევების რაოდენობა ისევ ისეთია, როგორიც იყო მასობრივ ტესტირებამდე. ეს ნიშნავს, რომ შეზღუდვები მუშაობს“, – განაცხადა ზაზა წერეთელმა.

მისი თქმით, პრემიერისა და ჯანდაცვის ექსპერტების შეხვედრაზე განხილული იყო საქართველოში არსებული ვითარება და ასევე იმსჯელეს, რა ხდება ევროპაში. ზაზა წერეთლის განცხადებით, აღნიშნულ იქნა, რომ შობისა და ახალი წლის დღეებში ევროპის ბევრი ქვეყანა არა თუ ასუსტებს, პირიქით – ამკაცრებს შეზღუდვებს.

„ყველას ეშინია, არ მოხდეს ხალხის მასობრივი შეკრება და ვირუსის სწრაფი გავრცელება, რადგან შობა და ახალი წელი ისეთი დღეებია, როდესაც მასობრივი შეკრება ხდება და ხალხი აღნიშნავს დღესასწაულს. ამიტომ ძალიან ბევრ ქვეყანაში გადაწყვიტეს, რომ შეზღუდვები გაგრძელდება. შესაძლოა, კიდევ დაემატოს შეზღუდვები. ზოგიერთმა ქვეყანამ გადაწყვიტა, რომ თუ ადრე ფიქრობდნენ, იანვრის ბოლოს შეწყვეტდნენ შეზღუდვებს, ახლა ფიქრობენ, თებერვლამდეც კი შესაძლოა, გაგრძელდეს“, – განაცხადა ზაზა წერეთელმა.