ნიგერის ჩრდილოეთ-დასავლეთ ნაწილის ორ სოფელში ისლამისტების თავდასხმის შედეგად, სულ მცირე 100 ადამიანი დაიღუპა. ინფორმაციას ამის შესახებ საინფორმაციო სააგენტო France-Presse-ი ადგილობრივ ხელისუფლებაზე დაყრდნობით ავრცელებს.

„ახლახანს დავბრუნდით ინციდენტის ადგილიდან. ჩომა-ბანგოუს დასახლებაში 70 ადამიანია მოკლული, ხოლო ზარუმადარეიეს დასახლებაში კი 30 ადამიანი. 25-მა ადამიანმა მძიმე ჭრილობა მიიღო“, - განაცხადა ტონდიკივინდის მერმა, ალმუ ჰასანემ.

არსებული ინფორმაციით, ორ სოფელს ასზე მეტი ისლამისტი დაესხა თავს. თავდასხმა 2 იანვარს განხორციელდა, ტილაბერის რაიონში, რომელიც მალის ესაზღვრება.

ნიგერის ხელისუფლებამ აღნიშნულ რაიონში დამატებითი სამხედრო დანაყოფები გააგზავნა.

წყარო:

https://imedinews.ge/ge/msoflio/180014/nigeris-or-sopelshi-islamistebis-tavdaskhmis-shedegad-sul-mtsire-100-adamiani-daigupa