„ბრალდებულების მიერ ჩადენილი ქმედებების გარშემო გამოძიება ყველა მიმართულებით სრულად არის ამოწურული, დღევანდელ პროცესზე ჩვენ მივმართავთ სასამართლოს შუამდგომლობით, რათა ბრალდებულებს პატიმრობა შეეცვალოთ გირაოთი, რადგან ამ ეტაპისთვის უკვე მიზანშეწონილად აღარ მივიჩნევთ ყველაზე მკაცრი აღკვეთის ღონისძიების გამოყენებას“, – ამის შესახებ პროკურორმა, მიხეილ სადრაძემ დავითგარეჯის საქმესთან დაკავშირებით განაცხადა.

როგორც პროკურორმა აღნიშნა, ​ივერი მელაშვილისა და ნატალია ილიჩოვას ბრალეულობა საკმაოდ მაღალი მტკიცებულებითი სტანდარტით არის დადასტურებული.

„ჩვენ მოვიპოვეთ უტყუარი მტკიცებულებები მათ მიერ ჩადენილი ქმედებების გარშემო. გამოძიება სრულად ამოვწურეთ. ჩვენ ამ მტკიცებულებების ნაწილი, მათ შორის ფარული საგამოძიებო მოქმედებების შედეგად მოპოვებული მტკიცებულებების ნაწილი გავასაჯაროვეთ და ყველამ ერთად ვნახეთ ბრალდებულის აღიარება. ამავდროულად ჩვენ დავადგინეთ მოტივი, რომ ბრალდებულები მოქმედებდნენ მაღალი თანამდებობის პირების დავალებების შესაბამისად. აქედან გამომდინარე, ამ ეტაპისთვის მთელი გამოძიება მიმართულია სწორედ დავალებების გამცემის იდენტიფიცირებისათვის და ამ მიმართულებით ყველა ღონისძიებას ატარებს საგამოძიებო ორგანო, მათ შორის დღეს უკვე ერთი პირი იმყოფება გამოკითხვაზე. ამ მიმართულებით აქტიურად ვახორციელებთ ღონისძიებებს და შესაბამისი შედეგების თაობაზე საზოგადოებას მივაწვდით ინფორმაციას“, – განაცხადა პროკურორმა.

მისივე თქმით, ბრალდებულების ბრალეულობა საკმაოდ მაღალი სტანდარტით არის დადასტურებული პრაქტიკულად ყველაფერი არის ზედაპირზე.

„ჩვენ ყველამ ვიხილეთ, მათ აღიარება. შესაბამისად, რადგან მათ მიერ ჩადენილი ქმედებების გარშემო გამოძიება აბსოლუტურად ყველა მიმართულებით სრულად არის ამოწურული, დღევანდელ პროცესზე ჩვენ მივმართავთ სასამართლოს შუამდგომლობით, რათა ბრალდებულებს პატიმრობა შეეცვალოთ გირაოთი, რადგან ამ ეტაპისთვის უკვე მიზანშეწონილად აღარ მივიჩნევთ ყველაზე მკაცრი აღკვეთის ღონისძიების გამოყენებას. ამას აქვს თავის საფუძველი და ჩვენ პრაქტიკულად ბრალდებულების ქმედების აღიარება ვიდეოა-აუდიო ფორმით მოვიპოვეთ. ეს ნიშნავს შემდეგს, რომ ბრალდებულები თავისუფლებაში ყოფნის პირობებში დაელოდებიან სასამართლოს გადაწყვეტილებას და ჩვენ ამ პროცესში ვიქნებით პრინციპულები, კატეგორიულები. რაც შეეხება მიმდინარე გამოძიებას, ერთი პირი უკვე იმყოფება გამოკითხვაზე, ამ მიმართულებით დავალებების გამცემი პირების გარშემო აქტიურად მიმდინარეობს საგამოძიებო მოქმედებები და აუცილებლად შესაბამის დროს საზოგადოებას ვაცნობებთ ამ გამოძიებების შედეგების შესახებ“, – განაცხადა პროკურორმა.