ონის მუნიციპალიტეტში, სოფელ ბაჯიხევის მისასვლელ გზაზე, ფსორი-ბაჯიხევის მონაკვეთზე მეწყერი ჩამოწვა.

რაჭა-ლეჩხუმ-ქვემო სვანეთის სახელმწიფო რწმუნებული პარმენ მარგველიძე მუნიციპალიტეტის ხელმძღვანელ პირებთან ერთად სტიქიის ზონაში იმყოფებოდა.

„თაბაშირის კარიერთან ჩამოსულია დიდი ზომის მეწყერი, გრუნტისა და კლდის მასა, დაახლოებით 2000 კუბური მეტრი. ამასთან, ფერდობზე შეინიშნება მეწყრული ნაპრალი, რომელიც დამატებით საფრთხეს წარმოადგენს, ახალი მასის ჩამოსაშლელად. სტიქიის ზონიდან რამდენიმე მეტრში ბაჯიხევის მხარეს მეწყრული პროცესების გამო დაწეულია გრუნტი და გზის რკინა-ბეტონის საფარი 30 გრძივ მეტრზე დარჩენილია ჰაერში. ადგილობრივ მოსახლეობასთან და ხელისუფლების წარმომადგენლებთან ერთად ვიმსჯელეთ სტიქიის სალიკვიდაციო სამუშაოებზე. ამ ეტაპისთვის, მთავარი პრიორიტეტია სოფელში მისასვლელი ალტერნატიული გზის 300-მეტრიანი მონაკვეთის მოხრეშვა, შემდეგში ძირითადი გზის გაწმენდა ჩამოტანილი ნაშალი მასალისგან და ჩავარდნილი მონაკვეთის აღდგენა. ვრჩებით აქტიურ კომუნიკაციაში მოსახლეობასთან და ვეცდებით, უმოკლეს დროში დავიწყოთ სტიქიის სალიკვიდაციო სამუშაოები“, - განაცხადა პარმენ მარგველიძემ.

ინფორმაციას სოციალურ ქსელში რაჭა-ლეჩხუმ ქვემო სვანეთის სახელმწიფო რწმუნებულის პრესსამსახური ავრცელებს.