საქართველოს პარლამენტის თავმჯდომარის, არჩილ თალაკვაძის განცხადებით, ნიკა მელიასთვის სადეპუტატო იმუნიტეტის შეჩერების საკითხი განსახილველად უნდა გადაეცეს საპროცედურო საკითხთა და წესების, ასევე იურიდიულ საკითხთა კომიტეტებს.

„მეგობრებო, 35-ე საკითხი გახლავთ საქართველოს გენერალური პროკურორის წინადადება საქართველოს პარლამენტის წევრის ნიკანორ მელიას მიმართ გამოყენებული აღკვეთის ღონისძიება გირაოს უფრო მკაცრი აღკვეთის ღონისძიებით – პატიმრობით შეცვლის შესახებ სასამართლოსთვის შუამდგომლობით მიმართვასთან დაკავშირებით. საქართველოს გენერალური პროკურატურა მოგვმართავს წინასწარი თანხმობის გაცემის თაობაზე, რაც ეხება კონკრეტულად დეპუტატის იმუნიტეტის შეჩერების საკითხს. ეს წინადადება უნდა გადაეცეს საპროცედურო საკითხთა და წესების, ასევე იურიდიულ საკითხთა კომიტეტებს განსახილველად“, – აღნიშნა პარლამენტის ბიუროს სხდომაზე არჩილ თალალვაძემ.

უკვე ცნობილია, რომ საპარლამენტო უმრავლესობა ნიკა მელიასთვის იმუნიტეტის მოხსნის გადაწყვეტილებას მიიღებს.

საპროცედურო საკითხთა და წესების კომიტეტის თავმჯდომარე ირაკლი ქადაგიშვილმა დღევანდელ ბრიფინგზე განაცხადა, რომ „კანონზე მაღლა არავინ დგას, სადეპუტატო იმუნიტეტი არ არსებობს იმისთვის, რომ მართლმსაჯულების აღსრულება შეაფერხოს და დეპუტატს, რომელიც სრულიად ღიად, ცალსახად და შეგნებულად გადის კანონის ჩარჩოებიდან, ხელი დააფაროს“.

მისივე თქმით, როგორც საკომიტეტო დონეზე, ასევე პლენარულ სხდომაზე მიიღებენ იმუნიტეტის მოხსნის გადაწყვეტილებას, „რათა არავის მიეცეს შესაძლებლობა, დადგეს კანონზე მაღლა, შეგნებულად და მიზანმიმართულად მოუწყოს პროვოკაცია სახელმწიფო ინსტიტუტებს, კანონის უზენაესობის და თანასწორობის პრინციპებს“.

წყარო :