საქართველოს პრეზიდენტი გიორგი მარგველაშვილი საქართველოს დელეგაციასთან ერთად ვარშავაში NATO-ს სამიტზე დასასწრებად უკვე მივიდა.

„აქ ვართ მეგობრებთან ერთად და ვამუშავებთ სტრატეგიას, თუ როგორ გავხადოთ მსოფლიო, შავი ზღვა და საქართველო უფრო უსაფრთხო ადგილი", - განაცხადა სამიტზე შესვლამდე საქართველოს პრეზიდენტმა.

გაიმართება NATO-ს გენერალური მდივნის და პოლონეთის რესპუბლიკის პრეზიდენტის მისალმების ოფიციალური ცერემონია, რის შემდეგაც დელეგაციის ხელმძღვანელები ერთობლივ ფოტოს გადაიღებენ.

ვარშავის სამიტის ფარგლებში, დღეს პირველად გაიმართება NATO-საქართველოს კომისიის სხდომა საგარეო საქმეთა მინისტრების დონეზე, რომელშიც მონაწილეობას საქართველოს საგარეო საქმეთა მინისტრი მიხეილ ჯანელიძე მიიღებს.

საქართველოს პრეზიდენტი დღეს სამიტის ფარგლებში, ბელგიის პრემიერ-მინისტრს შეხვდება.  ასევე დაგეგმილია  საქართველოს საგარეო საქმეთა მინისტრის შეხვედრა ნიდერლანდების  და საფრანგეთის საგარეო საქმეთა მინისტრებთან და თავდაცვის მინისტრის შეხვედრა აშშ-ის თავდაცვის მდივნის თანაშემწესთან.

საქართველოს პრეზიდენტი დღის ბოლოს სამუშაო სადილს დაესწრება, რომელიც NATO-ს პარტნიორი ქვეყნების დელეგაციათა ხელმძღვანელების პატივსაცემად გაიმართება.