მედია-ჰოლდინგ „რეპორტიორის" დამფუძნებელი ნუგზარ ფოფხაძე რევაზ ლაღიძეს იხსენებს.

„რევაზ ლაღიძე - 95 !!!!!

დღეს დიდი და განუმეორებელი რეზო ლაღიძე 95 წლის შესრულდებოდა.

ადრინდელ ერთ მოგონებას გთავაზობთ, ჩემს მეგობრებს, სულ მცირეოდენ შტრიხს. რა თქმა უნდა მეამაყება (თავმდაბლობის დრო აღრ მაქვს) მასთან სიახლოვე და მეგობრობა, ისევე, როგორც ის ფაქტი, რომ მისი ერთი, ბოლო დიდებული სიმღერა, მიძღვნილი დედა ენისადმი, ჩემი დაჟინებული თხოვნით, გვიან ღამით, რამდენიმე საათში შეიქმნა და... კლავირიც მისი "სათანადო" წარწერით ძვირფას რელიქვიად შემონახულიც მაქვს.

ნათელში იყოს დიდი რეზო ლაღიძე, რომელსაც მოვა დრო, ქართული საზოგადოება პატივით დაუსაკუთრებს ღირსეულ სამუდამო განსასვენებელ ადგილს მთაწმინდის კურთხეულ პანთეონში."

რევაზ ილიას ძე ლაღიძე 1921 წლის 10 ივლისს ქუთაისის მაზრის სოფელ ობჩაში დაიბადა.

1939 წელს დაამთავრა თბილისის IV სამუსიკო სასწავლებელი (ვიოლინოს განხრით), 1941-1949 წლებში ვიოლინოზე უკრავდა სიმფონიურ ორკესტრებში.

1948 დაამთავრა თბილისის კონსერვატორია (პროფ. ა. ბალანჩივაძის საკომპოზიციო კლასი). ლაღიძე სხვადასხვა ჟანრის მუსიკალური ნაწარმოებების ავტორია. მას ეკუთვნის ოპერა „ლელა" (1973), მუსიკალური კომედიები „მეგობრები" (1951) და „კომბლე" (1957), სიმფონიური პოემა „სამშობლოსათვის" (1949), სიმფონიური სურათი „საჭიდაო" (1952), რამდენიმე საგუნდო სიმღერა-კანტატა („სიმღერა სამშობლოზე", „ბალადა ვაზზე", „ოდა მესხეთზე", „მოხეური ბალადა" და სხვა), საფორტეპიანო („ტოკატა" და სხვა) და ჩელოს („პოემა", „ელეგია" და სხვა) პიესები, ერთნაწილიანი კანტატა „მელის ვარძია" შერეული გუნდისა და ორკესტრისათვის (1966, ირ. აბაშიძის ლექსზე ციკლიდან „რუსთაველის ნაკვალევზე"), მუსიკა სპექტაკლებისა (გ. ქელბაქიანის „ახალგაზრდა მასწავლებელი", ლ. ქიაჩელის „ტარიელ გოლუა" და სხვა სულ 40-ზე მეტი) და კინოფილმებისათვის („საბუდარელი ჭაბუკი", „ნინო", „ზვიგენის კბილი", „ხევისბერი გოჩა" და სხვა. სულ 30-ზე მეტი). ნაყოფიერად მუშაობდა სიმღერის ჟანრში. მისი სიმღერები გამოირჩევა იშვიათი მელოდიურობითა და გულწრფელობით. პოპულარულია ლაღიძის „სიმღერა თბილისზე".

რევაზ ლაღიძე ეწეოდა ნაყოფიერ პედაგოგიურ მოღვაწეობას. იყო პუშკინის სახელობის თბილისის პედაგოგიური ინსტიტუტის მუსიკის კათედრის გამგე. 1964 წლიდან კონსერვატორიის პედაგოგი (კამერული ანსამბლი). მიიღო სსრ სახელმწიფო პრემია (1977) და რუსთაველის სახელობის საქართველოს სახელმწიფო პრემია (1975).

დაკრძალულია დიდუბის მწერალთა და საზოგადო მოღვაწეთა პანთეონში.