გარდაცვლილი მედდის, მეგი ბაქრაძის ადვოკატებმა სისხლის სამართლის საქმის მასალებზე წვდომა მიიღეს. უფლებადამცველებს საქმის რვა ტომი გლდანი-ნაძალადევის პოლიციის სამმართველოში გადაეცათ.

ადვოკატი ვახტანგ ბარამაშვილი ამბობს, რომ საქმის მასალები სრულად გადაეცათ.

„როგორც ხედავთ, მასალები საკმაოდ მოცულობითია. შევისწავლით უახლოეს პერიოდში ამ მასალებს და შემდეგ გვექნება ბევრად უფრო კვალიფიციური და ინფორმირებული პოზიცია ნებისმიერ დეტალთან მიმართებაში, რაც საქმეს უკავშირდება.

საქმის მასალებში არის „იმედის კლინიკის“ მედპერსონალის გამოკითხვის ოქმები, ასევე თბილისის კლინიკის მედპერსონალი. ასევე, გამოკითხული არიან პირები, რომელთა იმუნიზაციაც მეგისთან ერთად მოხდა 18 მარტს.

ამ წუთისთვის, საქმეში კვლავაც არ გვაქვს სამხარაულის ექსპერტიზის ბიუროსა და ჯანდაცვის სამინისტროს რეგულირების სააგენტოს დასკვნა“, – განაცხადა ვახტანგ ბარამაშვილმა.

ადვოკატ ნინო ამაღლობელის თქმით, დღეს ადვოკატები ასევე იმყოფებოდნენ საგამოძიებო უწყებაში, სადაც მეგი ბაქრაძის ბიძის, ტარიელ ბაქრაძის მონაწილეობით გარდაცვლილი მედდის მობილური ტელეფონი დაათვალიერეს.

„დაათვალიერეს ტელეფონი მასში არსებული მნიშვნელოვანი მიმოწერებით. მოხდა კონკრეტული მოწმეების იდენტიფიცირება. კონკრეტული ჩათის მიმოწერის ავტორების იდენტიფიცირება, რომლებიც საუბრობენ ისეთ მნიშვნელოვან გარემოებებზე, როგორიცაა კლინიკა „იმედიდან“ მეგი ბაქრაძის დაგვიანებულ ტრანსპორტირებაზე თბილისის პირველ საუნივერსიტეტო კლინიკაში; ასევე ისეთი პირების მიმოწერები, რომლის შინაარსიც არის, რომ მკვდარი წამოიყვანეს ბაქრაძე კლინიკა „იმედიდან“. აღნიშნული ტელეფონი წინა დღეებში ამოიღო საგამოძიებო უწყებამ, შემდგომ აიღეს განჩინება დათვალიერების თაობაზე და დღეს მოხვდა უკვე უშუალოდ ბიძის მონაწილეობით მეგის ტელეფონის დათვალიერება. ჩვენ ველოდებით შემდგომში საგამოძიებო უწყების რეაგირებას და მობილური ტელეფონის მიმოწერებში არსებული პირების მოწმის სახით გამოკითხვას“, – განაცხადა ნინო ამაღლობელმა.

ახალციხიდან თბილისში გადმოყვანილი 27 წლის მედდა, რომლის მდგომარეობა 18 მარტს, აცრის შემდეგ დამძიმდა, პირველ საუნივერსიტეტო კლინიკაში 19 მარტს გარდაიცვალა.

შინაგან საქმეთა სამინისტრომ მედდის გარდაცვალების ფაქტზე გამოძიება 116-ე მუხლის პირველი ნაწილით დაიწყო, რაც გაუფრთხილებლობით სიცოცხლის მოსპობას გულისხმობს.

წყარო :