შინაგან საქმეთა მინისტრის მოადგილე არჩილ თალაკვაძე თანამდებობას მაშინ დატოვებს, როგორც კი ამას კანონი დაავალდებულებს.

არჩილ თალაკვაძის თქმით, ის შეუერთდა „ქართული ოცნების" საპარლამენტო გუნდს, იმის გამო, რომ „ქართული ოცნება" არის გუნდი, რომელმაც უზრუნველყო, რომ დღეს ბიზნესი არის ხელშეუხებელი, ადამიანის უფლებები არის დაცული და მედიასივრცე თავისუფალი, ხოლო ჯანდაცვა ხელმისაწვდომი.

„ეს არის ის წინაპირობები, რომლებსაც შემდეგი 4 წლის განმავლობაში პრემიერ-მინისტრ კვირიკაშვილის თაოსნობით, დავაშენებთ და დავამატებთ წარმატებულ რეფორმებს. ეს არის განათლების და ეკონომიკური სფეროს რეფორმები. ეს არის ინფრასტრუქტურის შემდგომი განვითარება საქართველოში, სახელმწიფო მმართველობის სისტემის მოდერნიზაცია და გაუმჯობესება. ეს არის ის მიზნები, რისთვისაც მე შევუერთდი „ქართული ოცნების" საპარლამენტო გუნდს", - განაცხადა არჩილ თალაკვაძემ.