„ვისაც გჯერათ, დაელოდეთ’ – ასე გამოეხმაურა „სტრატეგია აღმაშენებლის“ ლიდერი გიორგი ვაშაძე მიხეილ სააკაშვილის განცხადებას, რომლითაც ექსპრეზიდენტმა საქართველოში დაბრუნება ამჯერად თვითმმართველობის არჩევნების წინ დააანონსა.
„რაც შეხება ჩემს საქართველოში ჩამოსვლას, მე საქართველოში ჩამოვალ არა პუტინის ოცნების ასახდენად, არამედ საქართველოს პუტინის დავალებების შემსრულებლებისგან საქართველოს გასათავისუფლებლად”, – განაცხადა სააკაშვილმა.
„შემოდგომის არჩევნების პერიოდში დიდი ალბათობით ვიპოვი საშუალებას, რომ ჩავერთო არჩევნებში. არჩევნების შემდეგ დარწმუნებული ვარ, რომ ეგრევე ჩამოვალ საქართველოში. დარწმუნებული ვარ გამარჯვებაში, ამაში საერთოდ ეჭვი არ მეპარება”, – ეს განცხადება სააკაშვილმა ოდესის ოლქის გუბერნატორის რანგში 2016 წლის 25 აპრილს გააკეთა.
„მინდა, გავაფრთხილო ივანიშვილი, ჩამოვალ საქართველოში. თამაშობთ ამ თამაშებს? ცუდად დაამთავრებთ, ჩამოვალ საქართველოში. მე არ წავალ ჰოლანდიაში, არ წავალ ევროპაში, როგორც ამათ უნდათ. ეს არის ამათი ერთობლივი თამაში (პოროშენკო და ქართული ოცნება)… ასე რომ, ამისთვისაც შეუძლიათ, იყვნენ მზად, როდესაც ამ თამაშებში შედიან პოროშენკოსთან და სხვა ადგილობრივ ოლიგარქებთან”, – განაცხადა მიხეილ სააკაშვილმა.
„ჩამოვალ საქართველოში და ყველა პროგრამას განვახორციელებ ჩვენს გუნდთან ერთად. მე არ მივატოვებ ქართველ ხალხს განსაცდელში. მაფიის თარეში უნდა დასრულდეს”, – ამბობდა სააკაშვილი.
საგულისხმოა, რომ ამ განცხადებამდე ზუსტად 3 დღით ადრე, 2018 წლის 31 მარტს, სააკაშვილმა უკრაინულ ტელეკომპანია News One-თან ინტერვიუში თქვა, რომ ის უკრაინაში დაბრუნებას გეგმავდა…
„გილოცავთ გიორგობას, მალე ჩამოვალ საქართველოში!“ – ამ სიტყვებით მიმართ საქართველოს ყოფილმა პრეზიდენტმა მიხეილ სააკაშვილმა საქართველოს მოქალაქეებს 2018 წლის 23 ნოემბერს.
„მე ჩამოვალ ჩემს ვენახში, გავიხედ-გამოვიხედავ, მივიხედ-მოვიხედავ, დავწურავ პირველ მოსავალს – ძალიან მაგარ ღვინოს ვაკეთებ და მერე, შეიძლება, ყვარლის მერი გავხდე, შეიძლება, ლაზიკაში ჩავიდე და ლაზიკის მერი გავხდე და შეიძლება, საერთოდ არაფერი არ ვიყო და კონსულტანტი ვიყო პერსპექტიული, ახალგაზრდა საქართველოს მთავრობის…“, – განაცხადა 2019 წლის 3 აპრილს მიხეილ სააკაშვილმა.
„მე, რა თქმა უნდა, ვაპირებ საქართველოში ჩამოსვლას, მაგრამ ეს ძველად რომ იყო “მესიანებული“, ჩამოვიდა მესია ზემოდან და გადაწყვიტა ყველაფერი, ესე აღარ იქნება”, – განაცხადა მიხეილ სააკაშვილმა ოდესაში ქართველ ახალგაზრდებთან შეხვედრისას.
“უახლოეს თვეებში მე ვაპირებ ჩამოვიდე საქართველოში. არაფერი საიდუმლო არ არის. მართალია, უკრაინაში კარგად ვგრძნობ თავს, მაგრამ როცა სამშობლოს კარგავ…“, – ეს განცხადება კი სააკაშვილმა 2019 წლის 30 სექტემბერს გააკეთა.
„მზად ვარ, ვიტვირთო მთავრობის ხელმძღვანელის ფუნქცია, ვიქნები პრემიერ-მინისტრი არასრული ვადით, მაქსიმუმ ორი წელი, რაც იქნება საკმარისი, რომ ქვეყანა ამოვათრიო ჭაობიდან“, – ამის შესახებ საქართველოს ყოფილმა პრეზიდენტმა, უკრაინის რეფორმების საბჭოს აღმასრულებელი კომიტეტის თავმჯდომარემ, მიხეილ სააკაშვილმა ვიდეომიმართვისას განაცხადა.
“ნაციონალურმა მოძრაობამ“ და მთელმა რიგმა სხვა ადამიანებმა დააყენეს საკითხი იმისა, რომ მე გავხდე საქართველოს მთავრობის ხელმძღვანელი, საქართველოს პრემიერ-მინისტრი. ამაზე ბევრს ვფიქრობ და მინდა გითხრათ, რომ მზად ვარ ვიტვირთო ეს ფუნქცია არასრული ვადით, არამედ მაქსიმუმ ორი წელიწადი“, – განაცხადა მიხეილ სააკაშვილმა.
„თუ ოპოზიცია გადაწყვეტს, რომ ჩემი ჩამოსვლა საჭიროა, მე პირველივე თვითმფრინავს ვიშოვი, მოვახტები, სხვა საშუალებას ვიშოვი გადაადგილების და ა.შ. მე ვარ მზად, ვიყო ერთ-ერთი მათგანი, მე არ მინდა არცერთი თანამდებობა. ვარ მზად, ჩემი ქვეყნისთვის გავწირო თავი საერთოდ ულაპარაკოდ“, – აღნიშნა სააკაშვილმა 2020 წლის 1-ლ ნოემბერს.
„გაანძრიეთ ხელი და ჩამოვალ. ადამიანი იხრჩობოდაო და.. ხომ იცით ეს – მე ყველაფერს გავაკეთებ, მე ვარ ბოლომდე წამსვლელი. შემომხედეთ კარგად, მე ვარ ბოლომდე, ბოლომდე, ბოლომდე წამსვლელი. მე ვარ ჩემი სიცოცხლის შემწირავი მაგ საქმეზე, მაგრამ თუ გინდათ, რომ უბრალოდ სიცოცხლე კი არ გავწიროთ, არამედ გავიმარჯვოთ, გაანძრიეთ ხელი” – აღნიშნა სააკაშვილმა.
“მე შემიძლია, ჩამოვიდე და თავი შევწირო, მაგრამ თქვენთვის შედეგი იქნება, ერთი პრეზიდენტი მოვკალით უკვე, ზვიად გამსახურდია, რა გინდათ, კი ბატონო, ჩამოვალ, შევწირავ თავს. ჩვენ გვინდა საერთო გამარჯვება. მე მზად ვარ ყველაფრისთვის და მათ შორის, თავის შეწირვისთვის. თქვენ რა გინდათ, გამარჯვება გინდათ თუ თავის შეწირვა, უბრალოდ, ზვარაკად მიტანა საქართველოდან რუსეთის მიერ გაგდებული კიდევ ერთი პრეზიდენტის სიცოცხლის, ეს ერთად გადავწყვიტოთ და თუ თქვენ გადაწყვეტთ, რომ ეს არის მნიშვნელოვანი, ამისთვისაც მზად ვარ“, – განაცხადა სააკაშვილმა 15 ნოემბერს.
2021 წლის 22 თებერვალს სტამბოლის აეროპორტში ქართველ მგზავრსა და მიხეილ სააკაშვილს შორის დიალოგი შედგა, სადაც ექსპრეზიდენტმა ტრადიციულ დაბრუნებაზე ისაუბრა.
„გელოდებით, მაგრამ თქვენ არ მოდიხართ“ – უთხრა მიხეილ სააკაშვილს მხარდამჭერმა, რომელიც ყოფილ პრეზიდენტს შემთხვევით სტამბულის აეროპორტში შეხვდა. სააკაშვილმა ახალგაზრდა მხარდამჭერს მიუგო, რომ როგორც კი დაუძახებენ, მაშინვე ჩამოვა საქართველოში.
მხარდამჭერი: გელოდებით, რომ ჩამოხვიდეთ საქართველოში.
სააკაშვილი: აი, როცა დამიძახებთ მაშინ ჩამოვალ.
მხარდამჭერი: ჩვენ გელოდებით ყველა, მაგრამ თქვენ არ მოდიხართ…
სააკაშვილი: როგორ არ მოვდივარ კაცო, აგერ პირდაპირ რეისს მოვახტები ეხლა.
„თუ იმაზე საუბრობთ, რომ მე ჩემს ქვეყანაში არ უნდა ჩამოვიდე სიკვდილამდე? მაგას ვერ ეღირსება ვერავინ – საქართველო არის ჩემი სამშობლო!”, – წერდა 2021 წლის 27 მარტს, სააკაშვილი სოციალურ ქსელში.
“მე მიხეილ სააკაშვილი, ამ რეფერენდუმის (ადგილობრივი არჩევნები) წინ ჩამოვალ საქართველოში, ფიზიკურად ვიქნები თქვენთან, რა რისკის ფასადაც არ უნდა იყოს ეს ჩემი სიცოცხლისთვის, თუ ჩემი თავისუფლებისთვის. მე აუცილებლად ვიქნები ამ პროცესის უშუალო მონაწილე, დამსწრე და თქვენთან ერთად ჩვენი გარდაუვალი გამარჯვების შემოქმედი“, – აცხადებს მიხეილ სააკაშვილი საგანგებო მიმართვაში.
|
პარტნიორები ქარტია ფოტო არქივი |
ბმულები რეკლამა კონტაქტი |
!!! All rights reserved Property of Reportiori |
|
