„უცნაური და ძალიან გასაკვირია მსგავსი შინაარსის საყვედური მმართველი პარტიის მიმართ, მაშინ, როდესაც პარტნიორებმა ელემენტარულად ისიც კი ვერ უზრუნველყვეს, რომ ოპოზიციას შეესრულებინა მთავარი პირობა და შარლ მიშელის დოკუმენტზე ხელმოწერის შემდეგ ისინი უნდა ჩართულიყვნენ სრულფასოვან საპარლამენტო საქმიანობაში,“ - ამის შესახებ ექსპერტი ვლადიმერ ბოჟაძე სოციალურ ქსელში წერს და აშშ-ის საელჩოს მიერ გაკეთებულ განცხადებას ეხმაურება, რომლის თანახმად აშშ-ის წარმომადგენლებმა მმართველი პარტიის მიმართ საყვედური გამოთქვეს.

მისი თქმით, შარლ მიშელის ეგიდით შედგენილი დოკუმენტი არ ავალდებულებს „ქართული ოცნების“ დეპუტატებს, რომ ოპოზიცია ძალის გამოყენებით დაასწრონ სხდომებს. მისივე თქმით, ეს მათი პოლიტიკური კულტურის და პარტნიორებთან პასუხისმგებლობის ნაწილი უნდა იყოს:

„მინდა გამოვეხმაურო ამერიკის საელჩოს გუშინდელ განცხადებას. უცნაური და ძალიან გასაკვირია მსგავსი შინაარსის საყვედური მმართველი პარტიის მიმართ, მაშინ, როდესაც პარტნიორებმა ელემენტარულად ისიც კი ვერ უზრუნველყვეს, რომ ოპოზიციას შეესრულებინა მთავარი პირობა და შარლ მიშელის დოკუმენტზე ხელმოწერის შემდეგ ისინი უნდა ჩართულიყვნენ სრულფასოვან საპარლამენტო საქმიანობაში, ხოლო „ქართული ოცნება“ უპირობოდ წავიდა ყველა კომპრომისზე, უსაყვედურო მმართველ ძალას, კონკრეტული კანონპროექტის განხილვაში ოპოზიცია რატომ არ მონაწილეობდაო - უსამართლო და გასაკვირია.

პრეზიდენტ მიშელის დოკუმენტში ნათლად წერია, რომ ხელმომწერი სუბიექტები იღებენ პასუხისმგებლობას, რომ მონაწილეობას მიიღებენ სრულფასოვან საპარლამენტო საქმიანობაში. დოკუმენტი არ ავალდებულებს „ქართული ოცნების“ დეპუტატებს, რომ ოპოზიცია ძალის გამოყენებით დაასწრონ სხდომებს, ეს მათი პოლიტიკური კულტურის და პარტნიორებთან პასუხისმგებლობის ნაწილი უნდა იყოს“, - აღნიშნავს ბოჟაძე.