„თურქეთი და შეერთებული შტატები შეთანხმდნენ, თურქულმა შეიარაღებულმა ძალებმა როგორ უნდა უზრუნველყონ ქალაქ ქაბულის აეროპორტის უსაფრთხოება მას შემდეგ, რაც აშშ-ის ჯარები სრულად დატოვებენ ავღანეთს,“ – ამის შესახებ თურქეთის პრეზიდენტმა, რეჯეფ თაიფ ერდოღანმა განაცხადა.

„შეერთებულ შტატებთან და NATO-სთან დისკუსიებისას, ჩვენ შევთანხმდით იმაზე, თუ რა იქნება ამ მისიის მასშტაბი, რა შეიძლება იყოს მისაღები და რა – მიუღებელი“, – აღნიშნა ერდოღანმა.

მანამდე, ოფიციალურმა ანკარამ ვაშინგტონს შესთავაზა ქაბულის საერთაშორისო აეროპორტის უსაფრთხოებაზე პასუხისმგებლობის აღება მას შემდეგ, რაც აშშ-ის ძალები აგვისტოს ბოლოს ავღანეთს სრულად დატოვებენ. ამ საკითხთან დაკავშირებით საუბარი ჯო ბაიდენსა და რეჯეფ თაიფ ერდოღანს შორის გასულ თვეს, NATO-ს სამიტის ფარგლებში შედგა.

თურქული მხარე ქაბულის აეროპორტის უსაფრთხოების უზრუნველსაყოფად ჩრდილოატლანტიკური ალიანსის მოკავშირეებისგან ფინანსურ, პოლიტიკურ და ლოგისტიკურ დახმარებას ითხოვს. ამჟამად ავღანეთში 500 თურქი სამხედრო იმყოფება.