„დაკავებულია 20-მდე ადამიანი და გამოძიება მიმდინარეობს“, – ამის შესახებ „ქართული ოცნების“ დეპუტატმა შალვა პაპუაშვილმა გარდაცვლილი ოპერატორის ლექსო ლაშქარავას საქმესთან დაკავშირებით „რუსთავი 2“-ის ეთერში განაცხადა.

პაპუაშვილის თქმით, 20 სხვადასხვა ტერიტორიაზე შეკრებილი ხალხის მართვა რთულია.

„ეს პროცესი იყო პირველი ივლისიდან დაწყებული 6 ივლისს დამთავრებული. ჩვენ ვნახეთ, რომ დაანონსებული იყო აქციები და შინაგან საქმეთა სამინისტრომ უზრუნველყო, რომ არ ყოფილიყო ინციდენტი. პირველში იყო ძალიან მძიმე მდგომარეობა, სამშიც და ექვსშიც.

5 ივლისს აქცია დაანონსებული იყო საღამოს 5 საათზე. ეს ძალადობა რაც მოხდა ჟურნალისტებზე, მოხდა 6 საათით ადრე, ვიდრე ეს იყო დაანონსებული. შინაგან საქმეთა მინისტრი მოვა პარლამენტში და ამ საკითხზე გვექნება დეტალური განხილვა. იყო 20 სხვადასხვა ლოკაციაზე შეკრებილი ადამიანები და, რა თქმა უნდა, ამის მართვა რთულია“, – აღნიშნა შალვა პაპუაშვილმა.

წყარო :