„მედიატორთა ასოციაციისა“ და ბიზნესომბუდსმენის ორგანიზებით, დღეს საერთაშორისო ფორუმი „მედიაცია ბიზნესისთვის“ გაიმართა.

ღონისძიების მხარდამჭერია აშშ-ის საერთაშორისო განვითარების სააგენტოს (USAID) პროგრამა – „კანონის უზენაესობის მხარდაჭერა საქართველოში“ (USAID/PROLoG). ფორუმი, რომელიც ონლაინფორმატში გაიმართა, საქართველოს პრეზიდენტმა, სალომე ზურაბიშვილმა გახსნა.

ფორუმზე სიტყვით გამოვიდა „საქპატენტის“ თავმჯდომარის მოადგილე ნინო ჩიქოვანი, რომელმაც აღნიშნა, რომ „საქპატენტში“ დავის გადაწყვეტის ალტერნატიული მექანიზმის დანერგვის მიმართულებით მუშაობა აქტიურად მიმდინარეობს.

„მედიაციის მოქნილი მექანიზმის დანერგვა უწყების ერთ-ერთი პრიორიტეტია, რადგან ის ინტელექტუალური საკუთრების უფლებების მფლობელებს დავის სწრაფ და ეფექტურ გადაწყვეტაში დაეხმარება და ასევე საშუალებას მისცემს შეინარჩუნონ კონფიდენციალურობა. ამასთან, დავების მორიგებით დასრულება მნიშვნელოვანია, რადგან მის შემდგომ, მხარეთა შორის არსებული ბიზნეს ურთიერთობა გრძელდება, ვითარდება და მყარდება კიდეც“, – აღნიშნა ნინო ჩიქოვანმა.

საქართველოს ინტელექტუალური საკუთრების ეროვნული ცენტრი – „საქპატენტი“ მედიაციის სისტემის დანერგვის მიმართულებით აქტიურად თანამშრომლობს „საქართველოს მედიატორთა ასოციაციასთან“. ამასთან, მედიაციის სისტემის დანერგვა ინტელექტუალური საკუთრების შესახებ ევროკავშირისა და საქართველოს მიმდინარე ერთობლივი პროექტის (EUGIPP) ერთ-ერთი კომპონენტია. აღნიშნული მიმართულებით საკუთარ გამოცდილებას, ევროკავშირთან ერთად, საქართველოს უზიარებს ინტელექტუალური საკუთრების მსოფლიო ორგანიზაციაც (WIPO).

საერთაშორისო ფორუმი „მედიაცია ბიზნესისთვის“ ყოველწლიურად იმართება. მისი მიზანი ბიზნესსექტორში მედიაციის როლსა და მნიშვნელობაზე ყურადღების გამახვილებაა.