ჯანდაცვის მსოფლიო ორგანიზაციის პროგნოზით, კორონავირუსის „დელტა“ ვარიანტი (ე.წ. ინდური შტამი), რომელიც ძალზე გადამდებია და რომელზეც ახალი შემთხვევების ¾-ზე მეტი მოდის, უახლოეს თვეებში დომინანტური იქნება.

„სავარაუდოდ, „დელტა“ ვარიანტი სწრაფად შეცვლის სხვა ვარიანტებს და კორონავირუსის დომინანტური ხაზი გახდება უახლოეს თვეებში“, - განმარტეს ჯანდაცვის მსოფლიო ორგანიზაციაში.

იმ ქვეყნებს შორის, სადაც ე.წ. ინდურ შტამზე ახალი შემთხვევების 75%-ზე მეტი მოდის, გვხვდება ინდოეთი, ჩინეთი, რუსეთი, ინდონეზია, ავსტრალია, ბანგლადეში, გაერთიანებული სამეფო, სამხრეთ აფრიკა, ავსტრალია, პორტუგალია და ისრაელი.

„ამ ტემპის გათვალისწინებით, სავარაუდოდ, გლობალური მასშტაბით კორონავირუსის შემთხვევების ერთობლივი რაოდენობა 200 მილიონს გადააჭარბებს მომდევნო სამი კვირის განმავლობაში“, - აღნიშნეს ჯანდაცვის მსოფლიო ორგანიზაციაში.

23 ივნისს დაავადებათა კონტროლის ევროპულ ცენტრში განაცხადეს, რომ აგვისტოს ბოლოს ე.წ. ინდური შტამი ევროკავშირში შემთხვევების 90%-ს შეადგენს.

11 მაისს ჯანდაცვის მსოფლიო ორგანიზაციის კორონავირუსთან ბრძოლის ტექნიკური ჯგუფის ხელმძღვანელმა, მარია ვან კერკხოვემ განაცხადა, რომ კორონავირუსის ვარიანტი, რომელიც პირველად გასულ წელს ინდოეთში გამოვლინდა, კლასიფიცირდება როგორც შემაშფოთებელი ვარიანტი.