საპარლამენტო უმრავლესობის წევრის მიხეილ სარჯველაძის განცხადებით, 19 აპრილის დოკუმენტის მთავარი დანიშნულება პოლიტიკურ ძალებს შორის კონსენსუსის მიღწევა იყო.

თუმცა, სარჯველაძის თქმით, „ნაციონალური მოძრაობის“ მხრიდან დოკუმენტის ბოიკოტის პირობებში აღნიშნულ დოკუმენტს დანიშნულება ეკარგება.

„ფაქტის დონეზე განსახილველია, რომ ამ დოკუმენტის მთავარი დანიშნულება იყო, პოლიტიკურ ძალებს შორის კონსენსუსი მიღწეულიყო. შესაბამისად, ყველა პოლიტიკური აქტორი გაერთიანებული ყოფილიყო ამ დოკუმენტის ირგვლივ და გარკვეულ თამაშის წესებზე შეთანხმებულიყო.

როდესაც ჩვენ ვხედავთ ყველაზე დიდად მხარდაჭერილი ოპოზიციური პარტიის მხრიდან ამ დოკუმენტი ბოიკოტს, ასეთ პირობებში საფუძველი და დანიშნულება ეკარგება ამ დოკუმენტს. აქედან გამომდინარე მიღებული იყო ეს გადაწყვეტილება, რაც რელევანტური და აბსოლუტურად მართალია. ამ დოკუმენტის მეშვეობით ყველა აქტორის გაერთანება როცა ვერ ხერხდება და ამაში ბრალი მიუძღვის თავიდან და ბოლომდე „ნაციონალურ მოძრაობას“, ამ ფონზე მთავარი, ვინც პასუხისმგებლობა უნდა აიღოს ამაზე, გახლავთ სწორედ „ნაციონალური მოძრაობა“, – განაცხადა მიხეილ სარჯველაძემ.

პარტია „ქართული ოცნების“ თავმჯდომარე ირაკლი კობახიძემ გუშინდელ ბრიფინგზე განაცხადა, რომ განსაკუთრებულ მადლობას უხდის შარლ მიშელს მისი ძალისხმევისა და მხარდაჭერისთვის, თუმცა დოკუმენტის ხელმოწერიდან 100 დღის თავზე აშკარაა, რომ მან თავისი მისია შეასრულა და თავი ამოწურა. მისივე თქმით, 19 აპრილის შეთანხმების ანულირებით, დღეიდან ქვეყანა კონსტიტუციურ ჩარჩოს დაუბრუნდა.

ამასთან, კობახიძის თქმით, მზად არიან, რიგგარეშე არჩევნები არა 43 პროცენტის, არამედ ხმების 53 პროცენტის მიღების შემთხვევაშიც დანიშნონ, თუ ოპოზიციური პარტიების ქცევიდან ამოიკითხავენ, რომ პოლიტიკური სისტემა ეფექტიანი კოალიციური მმართველობისთვის მომწიფებულია და სახელმწიფოს მართვის ამგვარი რეჟიმი მის ინტერესებს არ დააზიანებს.