თბილისის ინფექციური საავადმყოფოს დირექტორი თენგიზ ცერცვაძე აცხადებს, რომ საქართველოში ბინაზე და კოვიდ-სასტუმროებში 48 ადამიანი გარდაიცვალა.

„ჰოსპიტალს გარეთ გარდაცვლილთა რიცხვი, ანუ ბინაზე გარდაცვლილის და სასტუმროებში, არის 48. ეს მთელი 1.5 წლის მანძილზე. მაშინ, როდესაც უცხოეთის ყველაზე კარგი ჯანდაცვის მქონე ქვეყნებში არის ასეულები და ათასები. ინგლისში ჯერ კიდევ რამდენიმე თვის წინ ჰყავდათ 10 000 ასეთი გარდაცვლილი.

თქვენ სვამთ კითხვას, რატომ ვერ მოხერხდა მათი გადაყვანა, პირიქით დაგისვამთ, როგორ მოხერხდა იმდენი ხალხის გადაყვანა, რომ მხოლოდ 48 გარდაიცვალა ბინაზე, როცა, ინგლისში 10 000 ასეთი გარდაცვლილი იყო.

საქართველოს აქვს ყველაზე დაბალი რიცხვი ბინაზე გარდაცვლილების და ეს არის ერთ-ერთი მთავარი ნიშანი ჯანდაცვის კლინიკური სექტორის კარგი მუშაობის, რადგან ნაკადები იმართება ეფექტიანად და ვისაც სჭირდება სამედიცინო დახმარება, ყველა გადაჰყავთ ჰოსპიტალში და იქ სათანადოდ მკურნალობენ.

თქვენ ლეგიტიმური კითხვა დასვით, რატომ ვერ მოხერხდა იმ 48 კაცის დროზე გადაყვანა?! ჩვენი ოპონენტები ხშირად გვაკრიტიკებენ, რომ საჭიროზე მეტი გადაგვყავს ჰოსპიტალში, ყველა არ საჭიროებს ჰოსპიტალიზაციას და ისეთებიც გვხვდებიან, მაგრამ სწორედ ამიტომ რომ გარკვეულწილად თავს იზღვევენ ექიმები და გადაჰყავთ ჰოსპიტალში პაციენტები, რომელთაც აქვთ რაღაც კრიტერიუმები ჰოსპიტალიზაციის, სწორედ ამიტომაა ასეთი დაბალი რიცხვი ბინაზე გარდაცვლილების.

დელტა შტამს ბინაზე გარდაცვალება არ გამოუწვევია, რადგან მეტია მობილიზება, ექიმებმა იციან, რომ დელტა შტამი სწრაფად ვრცელდება და მძიმე ფორმებს, ჰოსპიტალიზაციას 2-ჯერ ზრდის“, - განაცხადა თენგიზ ცერცვაძემ.