დაავადებათა კონტროლის ეროვნული ცენტრის დირექტორის მოადგილის პაატა იმნაძის განცხადებით, ორგანიზაცია IRI-ის კვლევით გამოჩნდა, რომ „ნაციონალური მოძრაობის“ მხარდამჭერები 2-ჯერ უფრო ნაკლებად აპირებენ აცრას, ვიდრე სხვა პარტიების ამომრჩევლები.

„ჯერ NDI-ის კვლევა იყო ძალიან საინტერესო და შემდეგ უკვე სამწუხაროდ, მე რაც ვნახე IRI-ის კვლევაში, იყო ძალიან საინტერესო მონაცემები, რომ ადამიანები, რომლებიც ჩემი, ამირანის ან თენგიზის გაშავებით არიან დაკავებული, საქმეს გვიფუჭებენ არა ჩვენ, არამედ მათ მომხრეებს, ვინც მათ უჯერებს, იმათ აქცევენ ანტივაქსერებად.

ამ კვლევაში გამოჩნდა ის, რომ თურმე არსებობს კონკრეტული პოლიტიკური მიმდინარეობის მხარდამჭერები, რომლებიც 2-ჯერ უფრო ნაკლებად აპირებენ აცრას, ვიდრე სხვა პარტიების მხარდამჭერები“, - აღნიშნა პაატა იმნაძემ.

მისი თქმით, საერთო მტერს ყველა ერთად უნდა ებრძოლოს და პარტიული ინტერესები გვერდზე გადადონ.

„მთელი პარტია მოწოდებული იყო იმისკენ, რომ ჩემთვის რეპუტაცია შეელახათ. ამაზე იყვნენ გადასული. ცოტა წინ უნდა გავიხედოთ ხოლმე, როცა მტერი საერთოა, როცა ვირუსი გიტევს, პარტია-მარტია აღარ არის, აღარ არსებობს მორწმუნე ურწმუნო, საერთო მტერს ერთად უნდა ვებრძოლოთ“, - განაცხადა პაატა იმნაძემ.