საქართველოს შინაგან საქმეთა სამინისტრო ე.წ. კანონიერი ქურდის, თეიმურაზ ჩხეტიანის დაკავების შესახებ განცხადებას ავრცელებს. 

შსს-ს ინფორმაციით, შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს დამნაშავეთა სამყაროს წინააღმდეგ ბრძოლის სამმართველოს თანამშრომლებმა, ჩატარებული ოპერატიულ-საგამოძიებო ღონისძიებების შედეგად, კანონიერი ქურდობის ბრალდებით, 1971 წელს დაბადებული, წარსულში რამდენჯერმე ნასამართლევი თეიმურაზ ჩ. დააკავეს.

"გამოძიებამ დაადგინა, რომ თეიმურაზ ჩ. ბოლო რამდენიმე წელი რუსეთის 
ფედერაციაში ცხოვრობდა და ე.წ. ქურდულ სამყაროში აღიარებულია „კანონიერ 
ქურდად". სამართალდამცველებმა ბრალდებული თბილისის საერთაშორისო აეროპორტში იმ დროს დააკავეს, როდესაც საქართველოში ოდესა-თბილისის რეისით ჩამოფრინდა. გამოძიება საქართველოს სსკ-ის 223-ე პრიმა მუხლის მე-2 ნაწილით, კანონიერი ქურდობის ბრალდებით მიმდინარეობს", - აცხადებენ შსს-ში.