„კიდევ ერთხელ მოვუწოდებ და ვთხოვ ყველა ორსულს, რომ აიცრან. რომელ თვეში იქნებიან, არ აქვს მნიშვნელობა, აუცილებლად ორჯერადად აიცრან“, - ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ „ინტერპრესნიუსს“ განუცხადა. მისი განმარტებით, აცრა ორსულს კორონავირუსით ინფიცირების შემთხვევაში შემდგომი გართულებებისგან დაიცავს.

ამირან გამყრელიძის ინფორმაციით, ორსულებთან მიმართებით პროტოკოლის შეცვლაზე მუშაობა მიმდინარეობს.

„მუშაობს მეან-გინეკოლოგთა ასოციაცია, დაავადებათა კონტროლის ეროვნული ცენტრიც ჩართულია ჯანდაცვის სამინისტროს კოორდინირებით და გარკვეული ცვლილებები იქნება, როგორც ატენატალური მეთვალყურეობის ეტაპზე, ისე ორსულობის პერიოდშიც. ზოგადად, ორსულობა მოწყვლადი მდგომარეობაა ამ ინფექციის დროს, განსაკუთრებით „დელტას“ შტამის შემთხვევაში. სამწუხაროდ, მთელ მსოფლიოში გახშირდა ორსულების ინფიცირება და რიგ შემთხვევაში, სავალალო გამოსავლით სრულდება. აღნიშნულის გათვალისწინებით, ძალიან საყურადღებო სიტუაციაა. დაცვის ერთადერთი საშუალება არის აცრა. ამიტომ, კიდევ ერთხელ მოვუწოდებ და ვთხოვ ყველა ორსულს, რომ აიცრან. რომელ თვეში იქნებიან, არ აქვს მნიშვნელობა, აუცილებლად ორჯერადად აიცრან, რადგან აცრა ორსულს შემდგომი გართულებებისგან დაიცავს“,- განაცხადა გამყრელიძემ.

წყარო :