გურიის გუბერნატორი გია სალუქვაძე მოადგილეებსა და მუნიციპალიტეტების ხელმძღვანელებთან ერთად არასამთავრობო ორგანიზაციის „ ახალგაზრდა მეცნიერთა კლუბი" თავმჯდომარეს მინდია სალუქვაძეს შეხვდა.

შეხვედრაზე გაერო-ს განვითარების პროგრამის მიერ გამოცხადებული კონკურსის შედეგები განიხილეს, რომლის გამარჯვებულიც  გურიის სამხარეო ადმინისტრაციისა და „ოზურგეთის ახალგაზრდა მეცნიერთა კლუბის" ერთობლივი პროექტი - „მოქალაქეთა ჩართულობის გაზრდა საბავშვო ბაღების მენეჯმენტში" გახდა.

პროექტის მიზანს გურიის ოთხ მუნიციპალიტეტში  რვა საბავშვო ბაღის მაგალითზე, საბავშვო ბაღების მიერ მომხმარებელთათვის გაწეული სერვისების დახვეწას წარმოადგენს. პროექტის ამოცანებია - ოთხივე მუნიციპალიტეტის  რვა საბავშვო ბაღის ეზო-გარემოს კეთილმოწყობა, სადაც  თანამედროვე სათამაშო ატრაქციონები განთავსდება; მშობლების ჩართულობის ხარისხის გაზრდა პროგრამული ბიუჯეტების მომზადების პროცესში; მენეჯმენტის დახვეწა და მომხმარებელთან ურთიერთობის თანამედროვე ფორმების დანერგვა.

აღნიშნული პროექტი თავსებადია „გურიის რეგიონის განვითარების სტრატეგიასთან" და  ამ დოკუმენტში მოყვანილ პრიორიტეტს შეესაბამება.  კერძოდ, კი განათლების, მეცნიერების, კულტურისა და სპორტის განვითარებას.