„რაც შეეხება ქუთაისს, ჩვენი ქვეყნის ერთ-ერთ ყველაზე მნიშვნელოვან ქალაქში უკვე დავიწყეთ „განახლებული რეგიონების“ ფარგლებში ურბანული განახლების პროექტები, უამრავი ინფრასტრუქტურული პროექტის დაფინანსება მიმდინარეობს და ამას გავაგრძელებთ“, - ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებს ქუთაისში განუცხადა.

მთავრობის მეთაურის თქმით, საჯარო მოხელეების ხელფასები არ გაზრდილა ბევრი წელია და ეს ქვეყნისთვის სერიოზული პრობლემაა.

„ძალიან ბევრი კვალიფიციური საჯარო მოხელე მუშაობს დღეს საჯარო უწყებებში და მათი ხელფასები არ გაზრდილა, უკვე წლებია. ჩვენი გადაწყვეტილებით, იანვრიდან უკვე დავიწყებთ საჯარო მოხელეების ხელფასების გაზრდას, მათ შორის ქუთაისშიც მერს აქვს იდეები და დაგეგმილი პროექტები. ძალიან ბევრი მნიშვნელოვანი პროექტი დაფინანსდება და მინდა კიდევ ერთი მნიშვნელოვანი რამ ვთქვა ქუთაისელებისთვის, მოგეხსენებათ, დაახლოებით 2 წლის წინ იყო პროექტი, რომელიც ითვალისწინებდა ელექტრომობილების წარმოებას, გვყავდა ძალიან სერიოზული ინვესტორი, შემდეგ პანდემიამ შეაფერხა ეს პროცესი და საბოლოო ჯამში ამ პროექტის განხორციელებამ გადაიწია. მინდა, ვაცნობო ქუთაისელებს, რომ ჩემი დავალებით, ჩვენ უკვე განვაახლეთ, დავიწყეთ ახალი მოლაპარაკებები ინვესტორ კომპანიასთან, ქარხნის დიდი ნაწილი ჩამოტანილია ადგილზე და ყველაფერს გავაკეთებთ, რომ ეს პროექტი მივიყვანოთ ბოლომდე, იმისთვის, რომ ქუთაისს დავუბრუნოთ ერთ-ერთი მთავარი ისტორიული მისია. აქ ჩვენ ძალიან მალე დავიწყებთ ელექტრო ავტომობილების გამოშვებასაც, ამისთვის მე პირადად ყველაფერს გავაკეთებ. რა თქმა უნდა, მე, როგორც პრემიერ-მინისტრი, აქტიურად ვიმუშავებ თითოეულ მერთან, ბუნებრივია, მჭიდრო ურთიერთობა მექნება ყველა მუნიციპალიტეტის მერთან და გვექნება ძალიან კარგი კოორდინაცია, იმისთვის, რომ ყველა ეს ამბიციური პროექტი და გეგმა განვახორციელოთ“, - განაცხადა პრემიერ-მინისტრმა.