„უკრაინის სახალხო დამცველმა საქართველოს ყოფილი პრეზიდენტ მიხეილ სააკაშვილის მოსანახულებლად უნდა მიმართოს სახელწიფოს და შესაბამისი პროცედურები გაიაროს“, – ამის შესახებ საპარლამენტო უმრავლესობის წევრმა, ირაკლი ქადაგიშვილმა განაცხადა.

როგორც ირაკლი ქადაგიშვილმა აღნიშნა, საქართველოს ყველასთვის ფეხების შესაწმენდი ქვეყანა არ არის, იქნება უკრაინის დეპუტატი, თუ სახალხო დამცველი

„მიხეილ სააკაშვილი პატივს რომ არ სცემს იმ ქვეყანას, რომლის პრეზიდენტიც ერთ დროს იყო, ეს წესი და რიგი არ უნდა გახდეს. საქართველოს ყველასთვის ფეხების შესაწმენდი ქვეყანა არ არის, იქნება უკრაინის დეპუტატი, თუ სახალხო დამცველი. ყველამ კეთილი უნდა ინებოს და ჩვენი ქვეყნის სუვერენიტეტს პატივი სცეს. ჩვენი ქვეყნის შიდა მდგომარეობა პოლიტიკური მიზნებისთვის არავის ადვილად არ უნდა გამოვაყენებინოთ. ამიტომ, მან უნდა მიმართოს სახელწიფოს და შესაბამისი პროცედურები გაიაროს. შესაბამისი პატივისცემა გამოხატოს საქართველოს სახელმწიფოს მიმართ. ლაპარაკია საქართველოს სახელმწიფოზე – ყველამ კეთილი უნდა ინებოს და ამ სახელმწიფოსთან ითანამშრომლოს, ისაუბროს ისე, როგორც ეს სუვერენულ სახელმწიფოსთან არის მიღებული“, – განაცხადა ქადაგიშვილმა.

უკრაინის სახალხო დამცველი ლუდმილა დენისოვა დღეს გლდანის მე-18 დაწესებულებასთან იმყოფებოდა, რომელმაც აღნიშნა, რომ მიხეილ სააკაშვილის მონახულებაზე ციხის ადმინისტრაციამ უარი უთხრა.

ამასთან, საქართველოს იუსტიციის მინისტრმა, რატი ბრეგაძემ განაცხადა, რომ საქართველოს კანონმდებლობით, პენიტენციურ დაწესებულებაში უკრაინის სახალხო დამცველის შესვლა გათვალისწინებული არ არის და ამის ვალდებულება არ არსებობს.