ნიდერლანდების ქალაქ როტერდამში კოვიდშეზღუდვების მოწინააღმდეგეთა აქცია მასობრივ არეულობაში გადაიზარდა, დაშავდა 7 ადამიანი. ამის შესახებ ადგილობრივი მედია წერს.

მომიტინგეებმა ქალაქში, რამდენიმე ადგილას ხანძარი გააჩინეს, სამართალდამცველებს კი ქვები დაუშინეს. პოლიციამ დემონსტრანტების წინააღმდეგ წყლის ჭავლი გამოიყენა.

როტერდამის მერის, აჰმედ აბუთალების განცხადებით, დაკავებულია 20 ადამიანი. მან ქალაქში მომხდარს „ძალადობის ორგია“ უწოდა.

კორონავირუსის შემთხვევების ზრდის გამო ნიდერლანდების ხელისუფლებამ ნაწილობრივი ლოკდაუნი შემოიღო. ბარები, რესტორნები და სუპერმარკეტები 20:00 საათზე იკეტება, სხვა მაღაზიები კი 18:00 საათზე. დასაქმებულთა უმეტესობა დისტანციური მუშაობის რეჟიმზე უნდა გადავიდეს, კვლავ ამოქმედდა სოციალური დისტანციის დაცვის ვალდებულება.

წყარო :