ფოტოხელოვანმა ანა გოგუაძემ PIA.GE-სთან საქართველოს მთავრობის მიერ სპინალური კუნთოვანი ატროფიის მედიკამენტის ხარჯების 2022 წლის ბიუჯეტში გათვალისწინების შესახებ ისაუბრა.

მისი თქმით, ეს მნიშვნელოვანი გადაწყვეტილება იყო, რადგან ამ წამლის მიღების შემდეგ პაციენტები სიცოცხლის გახანგრძლივებას შეძლებენ.

„ძალიან მნიშვნელოვანი რამე მოხდა. იმდენად ძვირად ღირებულ მედიკამენტზეა საუბარი, რომ მე პირადად,  როგორც რიგითი პაციენტი და მოქალაქე, მართლა არ მოველოდი, რომ ასე მალე მოხდებოდა ამ ყველაფრის ბიუჯეტში ჩასმა. ამ წამლის მიღების შემდეგ პაციენტები შეძლებენ სიცოცხლის გახანგრძლივებას. მან შეიძლება ბევრი დადებითი ცვლილება მოუტანოს პაციენტს, სასიცოცხლოდ მნიშვნელოვანი მედიკამენტია რეალურად. რაც უფრო ადრეული ასაკიდან ხდება ამ მედიკამენტის მიღება, მით უფრო კარგი შედეგები აქვთ პაციენტებს. ირაკლი ღარიბაშვილი იყო ბოლო ინსტანცია ამ ამბის, ჯანდაცვის სამინისტროსთან ერთად. პრემიერმა ითამაშა დიდი როლი იმაში, რომ ეს წამალი დღეს დაფინანსებულია“, - აღნიშნა ანა გოგუაძემ.

სპინალური კუნთოვანი ატროფია მძიმე გენეტიკური, პროგრესირებადი ნეიროკუნთოვანი დაავადებაა, რომელიც იწვევს კუნთების ატროფიას და მასთან დაკავშირებულ გართულებებს.  იგი იშვიათი დაავადებების ჯგუფს მიეკუთვნება და დაახლოებით 6000-9000-დან 1 ახალშობილს უვლინდება მსოფლიოში. უმეტესად დიაგნოსტირდება ბავშვთა ასაკში და ჩვილი ბავშვების სიკვდილიანობის ყველაზე გავრცელებული გენეტიკურ მიზეზს წარმოადგენს.