ჩეხეთის მოსახლეობის 52% სავალდებულო ვაქცინაციას უჭერს მხარს, ხოლო 42% საპირისპირო აზრზეა.

აღნიშნული გამოკითხვა კომპანია „NMS Market Research“-მა ჩაატარა, – იტყობინება Czech Radio.

ამასთან, სავალდებულო ვაქცინაციას არავაქცინირებულთა 89% ეწინააღმდეგება და ვაქცინირებულთა – 26%.

ასევე, აცრილი და აუცრელი ადამიანები განსხვავებულად აღიქვამენ კორონავირუსის საფრთხეებს.

ასე, მაგალითად, არავაქცინირებულთა​ 56%-ს მიაჩნია, რომ ვაქცინაცია უფრო საშიშია, ვიდრე – თავად კორონავირუსი. აცრილებს შორის ამგვარად მხოლოდ 13% ფიქრობს.

ჩეხეთმა დეკემბერში 60 წელზე უფროსი ასაკის ადამიანებისთვის სავალდებულო ვაქცინაცია დაამტკიცა.

მოთხოვნა ძალაში 2022 წლის 1 მარტიდან შევა.

გარდა ამისა, ვაქცინაცია სავალდებულო იქნება ჯანდაცვის მუშაკებისთვის, სოციალური მუშაკებისთვის, მეხანძრეებსა და პოლიციელებისთვის, ასევე, სამედიცინო უმაღლესების სტუდენტებისთვის, რომლებიც ემზადებიან სოციალურ სამსახურში სამუშაოდ.