„დედაქალაქის საკრებულო დღეს თბილისის მუნიციპალიტეტის 2022 წლის ბიუჯეტის დამტკიცებაზე მსჯელობს. ბიუჯეტი წარმომადგენლობით ორგანოში თბილისის ვიცე-მერმა, ირაკლი ხმალაძემ წარადგინა“, - ამის შესახებ ინფორმაციას თბილისის მერია ავრცელებს.

ირაკლი ხმალაძის განცხადებით, თბილისის 2022 წლის ბიუჯეტი ჯამში 1.545 მლრდ ლარი იქნება და ის სწორედ იმ პროგრამებსა და პროექტებზე იქნება მიმართული, რომელთა განხორციელებასაც თბილისის მერი მოსახლეობას დაჰპირდა.

„თბილისში განსახორციელებელი პროექტებისა და პროგრამების ჯამი გახლავთ 1.545 მლრდ ლარი. აქედან საბიუჯეტო ნაწილი არის 1.305 მლრდ ლარი, ხოლო დანარჩენი სესხის ნაწილი, რომელიც შეადგენს 240 მლნ ლარს. საშემოსავლო ნაწილი: ეს არის პრივატიზაცია - 75 მლნ ლარი; საგადასახადო შემოსავლები არის 757 მლნ ლარი, მათ შორის, 210 მლნ არის ქონების გადასახადი, ხოლო 547 მლნ არის დამატებული ღირებულების გადასახადი; სპეციალური ტრანსფერი, რომელსაც ცენტრალური ხელისუფლება აძლევს მუნიციპალიტეტს, არის 225 მლნ ლარი, რომელიც მიმართულია პირდაპირ პროექტებზე, ხოლო დამატებული ღირებულების გადასახადის მომსახურების მიზნით 43 მლნ 500 ათასი ლარი. სხვა შემოსავლები შეადგენს 203 მილიონს“, - განაცხადა თბილისის ვიცე-მერმა.

მისი თქმით, ბიუჯეტში სატრანსპორტო სისტემის მოწესრიგებისთვის 175 მლნ ლარია გათვალისწინებული.

„რაც შეეხება ხარჯვით ნაწილს, საგზაო ინფრასტრუქტურისთვის გამოყოფილია 87 მლნ ლარი, მათ შორის, რაიონული საგზაო ინფრასტრუქტურისთვის 52 მლნ ლარი, ხოლო ცენტრალური საგზაო ინფრასტრუქტურისთვის 35 მლნ ლარი. სატრანსპორტო სისტემის მოწესრიგებისთვის 175 მლნ ლარი, ინფრასტრუქტურის სამუშაოები, კეთილმოწყობა და თბილისის განვითარების ფონდის მიმართულება - 260 მლნ ლარის ხარჯებია გათვალისწინებული. ეკოლოგიური მდგომარეობის გაუმჯობესება - 167 მლნ ლარი, ჯანდაცვის მიმართულებით 176 მლნ ლარი, ჯამში 20 მლნ ლარით არის გაზრდილი“, - განაცხადა ირაკლი ხმალაძემ.

მისივე თქმით, განათლების მიმართულებით გამოყოფილია 208 მლნ ლარი, მათ შორის, 145 მლნ ლარი გათვალისწინებულია ბაგა-ბაღების დაფინანსებისთვის, როგორც ბაღების მართვისთვის, ასევე, ინფრასტრუქტურის განვითარებისთვის.

როგორც თბილისის ვიცე-მერმა განაცხადა, კულტურის, განათლებისა და სპორტის მიმართულებით გამოყოფილია 49 მლნ ლარი.