თბილისის საკრებულოს წევრი ვლადიმერ ბოჟაძე შალვა პაპუაშვილის პარლამენტის თავმჯდომარედ არჩევას ეხმიანება და ნატოსა და ევროკავშირში ინტეგრაციაზე ამახვილებს ყურადღებას.

„დღეს საქართველოს პარლამენტმა თავმჯდომარედ აირჩია პროფესიონალი, პატიოსანი და პრინციპული შალვა პაპუაშვილი, ადამიანი რომლის კვალიფიკაცია და განათლება ყველა პირობას ქმნის, რომ ის იყოს პარლამენტის ღირსეული თავმჯდომარე, ყველა პოლიტიკური ძალის წარმომადგენლის და ყველა დეპუტატის თავმჯდომარე.

მის სიტყვაში ბევრი საინტერესო საკითხი იყო, თუმცა მე საგარეო მიმართულებას გამოვყოფდი: „ჩვენი მთავარი საგარეო-პოლიტიკური პრიორიტეტია ნატოსა და ევროკავშირში ინტეგრაცია. როგორც მოგეხსენებათ, ჩვენს პოლიტიკურ გუნდს აქვს ამბიციური ამოცანა 2024 წელს წარადგინოს განაცხადი ევროკავშირის წევრობაზე. სწორედ ამიტომ, მომდევნო სამი წელი იქნება პერიოდი, როდესაც ჩვენ წინ გველის საკანონმდებლო რეფორმებით დატვირთული დღის წესრიგი, რომელმაც გარდამტეხი როლი უნდა შეასრულოს ევროკავშირთან ჩვენი ქვეყნის საკანონმდებლო და ინსტიტუციური დაახლოებაში, და ახალ ნიშნულზე მიიყვანოს ქვეყნის დემოკრატიული განვითარება. ჩვენი ეროვნული ამოცანაა ქვეყნის გამთლიანება და ჩვენი აფხაზი და ოსი დების და ძმების დაბრუნება. და ეს პარლამენტიც სრულფასოვანი იქნება მხოლოდ მაშინ, როდესაც ამ დარბაზში ჩვენთან ერთად აფხაზეთიდან და ცხინვალის რეგიონიდან არჩეული წარმომადგენლები ისხდებიან. ეს ის ამოცანაა, რომელიც თითოეულ ჩვენგანს უნდა აერთიანებდეს. ჩვენ გვაქვს გამორჩეული ქვეყანა, ღირსეული ხალხით, უნიკალური ისტორიით, მდიდარი კულტურით და სულიერების სადარაჯოზე მდგომი ეკლესიით. ეს ქვეყანა და ეს ხალხი იმსახურებს ერთიანობას, კეთილდღეობას, წინსვლას და განვითარებას; და სწორედ ამიტომ, ჩვენი განსაკუთრებული ვალია, ჩვენი ფიქრი და საქმე მივუძღვნათ ამ მიზანს. ეს იქნება ჩემი, როგორც პარლამენტის თავმჯდომარის, მთავარი ამოცანა. ღმერთი იყოს ჩვენი მფარველი!“- წერს ბოჟაძე Facebook-ზე.

პარლამენტის სპიკერად უმრავლესობის წევრი შალვა პაპუაშვილი აირჩიეს. მის კანდიდატურას 88 დეპუტატმა დაუჭირა მხარი, 1 დეპუტატი კი წინააღმდეგი იყო.