„ქართული ოცნების“ აღმასრულებელი მდივანი მამუკა მდინარაძე N1633 რეზოლუციაზე ფეისბუკგვერდზე პოსტს აქვეყნებს და წერს, რომ აღნიშნულ რეზოლუციასთან დაკავშირებით ოპოზიცია ორი დღეა თავის მართლების რეჟიმშია. ამასთან დაკავშირებით მდინარაძე რამდენიმე ფაქტზე საუბრობს და წერს, რომ ოპოზიციამ ევროსაბჭოს საპარლამენტო ასამბლეის რეზოლუციაზე მხარდაჭერით დააბრალა ომის დაწყება საქართველოს. „საკუთარი ქვეყნის ღალატში დოკუმენტალურად მხილებული მეხუთე კოლონა!.. ისტერიული თავის მართლება ბოლო ორი დღის განმავლობაში N1633 რეზოლუციაზე!.. მხოლოდ ფაქტები: 1. რეზოლუციის მე-4 პუნქტში ომის დაწყების თარიღად მითითებულია 2008 წლის 7 აგვისტო. 2. მე-5 პუნქტში წერია: „2008 წლის 7 აგვისტოს, საქართველოს სამხედრო ძალების მიერ ცხინვალის დაბომბვის გაუფრთხილებლად დაწყებით, ესკალაცია ახალ, კერძოდ ღია და სრულმასშტაბიანი საომარი მოქმედებების საფეხურზე გადავიდა. მძიმე არტილერიისა და კასეტური ბომბების გამოყენება, რამაც სერიოზული საფრთხე შეუქმნა სამოქალაქო მოსახლეობას, წარმოადგენდა სამხედრო ძალის არაპროპორციულ გამოყენებას საქართველოს მხრიდან“... 3. მე-6 პუნქტში რუსების მიერ წარმოებული ომი საპასუხო შეტევად არის მოხსენიებული. 4. რა თქმა უნდა, რეზოლუციაში ბევრი ისეთი საჩვენო პუნქტია, რომელიც ოკუპანტი ქვეყნის წარმომადგენლებს ძალიან არ მოეწონათ, ამიტომაც მათ საერთოდ დატოვეს დარბაზი, ნაც. მოძრაობის წარმომადგენლებმა კი პირიქით, მხარი დაუჭირეს რეზოლუციას მიუხედავად იმისა, რომ მეოთხე, მეხუთე და მეექვსე პუნქტები უცვლელად რჩებოდა რეზოლუციაში. 5. უაღრესად მნიშვნელოვანი დეტალი:
ხმების რაოდენობა რეზოლუციას ისედაც ჰყოფნიდა, ქართული დელეგაციის წევრების მხარდაჭერის გარეშე! 6. ეს იყო საკუთარი ქვეყნის დადანაშაულება (!), დაბრალება (!), რომ თითქოს 2008 წლის 7 აგვისტოს საქართველოს სამხედრო ძალების მიერ ცხინვალის „არტილერიითა და კასეტური ბომბებით“ დაბომბვით დაიწყო „ღია და სრულმასშტაბიანი საომარი მოქმედებები“. 7. მეოთხე პუნქტს, სადაც ომის დაწყების თარიღად 7 აგვისტოა მითითებული, თავისმართლებისას შეგნებულად არ ახსენებენ, რადგან მომდევნო პუნქტშივეა „აღწერილი“, რა მოხდა 7 აგვისტოს, რაც რეალობის დამახინჯებულ ინტერპრეტაციას წარმოადგენდა და მხოლოდ ოკუპანტის ინტერესებში შედიოდა. 8. თითქმის 10 წლის განმავლობაში საქართველოში პრაქტიკულად არავინ იცოდა რეზოლუციის და მისი ამ ჩანაწერის შესახებ, მას საგულდაგულოდ მალავდნენ. როდესაც ფაქტი გამოაშკარავდა, რეზოლუციისთვის ხმის მიცემას თავიდან კომპრომისი დაარქვეს, ხანგრძლივი უპასუხობისა და დუმილის შემდეგ კი ამბობენ, რომ ომის დაწყების შესახებ არსად წერია, - თუმცა რეზოლუციის ტექსტი საჯაროა! P.S. წლების განმავლობაში კონტექსტიდან ამოგლეჯილი ფრაზებით აბრალებდნენ იმის თქმას სხვას, რაც თვითონ არა სიტყვით, არამედ საქმით ჰქონდათ გაკეთებული: მათ ევროსაბჭოს საპარლამენტო ასამბლეის რეზოლუციაზე მხარდაჭერით დააბრალეს ომის დაწყება საქართველოს. საბედნიეროდ იგივე (რუსული) ნარატივი არც სტრასბურგის და არც ჰააგის სასამართლოებმა არ გაიზიარეს, რადგან ჩვენ ყველაფერი გავაკეთეთ იმისათვის, რომ საქართველოს ინტერესები დაგვეცვა და სამართლებრივ დავებში საქართველო ყველგან იმარჯვებს! ლუსტრაცია გრძელდება!“, - წერს მამუკა მდინარაძე.
